ژنێکی هەڵەبجەیی خەڵاتێکی نێودەوڵەتی لە یۆنان دەباتەوە

ئاڤا نیوز

چالاکوانێکی دیاری شاری هەڵەبجە، وەک تاکە نوێنەری عێراق و هەرێمی کوردستان، خەڵاتی جیهانیی دروستکەری گۆڕانکاری بۆ ساڵی 2025 بەدەستهێنا. خەڵاتەکە لەلایەن هاوپەیمانیی نێودەوڵەتی بۆ ژنانەوە دەبەخشرێت.

چیرۆکی سەرەکی: هاوپەیمانیی نێودەوڵەتی بۆ ژنان کە بنکەی سەرەکی لە واشنتنە، لیستی براوەکانی بۆ ساڵی نوێ ئاشکرا کرد. تێیدا هێرۆ وەکیل، خەڵاتی جیهانیی دروستکەری گۆڕانکاری بۆ ساڵی 2025 بەدەستهێنا.

لە کێبڕکێی ئەمساڵدا، 27 کەسایەتی لە سەرانسەری جیهانەوە کاندید کرابوون، هێرۆ وەکیل وەک ژنێکی کورد توانی سەرکەوتن بەدەست بهێنێت و لە ڕێوڕەسمێکدا لە وڵاتی یۆنان خەڵاتەکەی پێ بەخشرا.

لێدوانی فەرمی: هێرۆ وەکیل بە ئاڤای ڕاگەیاند: "لە هەموو جیهاندا 27 کەس کاندید کرابوون و لەسەر ئاستی عێراق و کوردستان تەنیا من دەستنیشان کرام. سوودی ئەم خەڵاتە ئەوەیە کە براوەکان بێ بەرامبەر دەبنە ئەندامی ئەم تۆڕە جیهانییە و دەتوانن بەشداری هەر خولێک بکەن کە لە جیهاندا بۆ مافەکانی ژنان دەکرێتەوە."

بۆچی گرنگە: جگە لە پاڵپشتی دارایی، ئەم خەڵاتە دەبێتە هۆی ئەوەی پڕۆژەی گرنگ و تایبەت بە ژنان بهێندرێتە شاری هەڵەبجە.