ئاڤای خەڵک؛ ئاڤا بەدواداچوون بۆ دواکەوتنی دەرماڵەی 187 مامۆستای ڕاهێنەر دەکات

ئاڤا نیوز

زیاتر لە 180 مامۆستای ڕاهێنەر لە هەولێر دوو ساڵە دەرماڵەیەکیان ڕاگیراوە و پێیان نەدراوە.

زانیاریی بەدەستهاتوو: مامۆستا تاریق، یەکێکە لەو مامۆستایانە بە ئاڤای وت، ساڵی ڕابردوو بە فەرمانی سەرۆکوەزیران دەبوو هەموو مامۆستایەکی ڕاهێنەر مانگانە دەرماڵەیەکی 50 هەزار دیناریمان پێبدرێت، مامۆستایانی هەموو کوردستان دەرماڵەکەیان وەرگرت ئێمە نەبێت لە بەڕێوەبەرایەتی گشتی پەروەردەی هەولێر، ژمارەمان 187 مامۆستایە و پارەکەمان بۆ کراوە بە چەکیش، بەڵام لە هیچ بانکێک بۆمان خەرج ناکرێت.

کۆی گشتی پارەی ئەو مامۆستایانە 112 ملیۆن و 200 هەزار دینارە و لە وەزارەتی دارایش ڕەزامەندی دراوە لەسەریان.

لێدوانی فەرمی: لوقمان سەعید، بەڕێوەبەری گشتیی پەروەردەی هەولێر، بە ئاڤای ڕاگەیاند، ئاگاداری بابەتەکەین، کێشەکە لە بانکە پارەی پێویستیان لەبەردەست نییە، لەسەر هێڵێن و هەوڵی چارەسەرکردنی کێشەکەمان داوە، بەمزووانە پارەکەیان بۆ خەرج دەکرێت.