ئاگرەکەی کێڵگەی کۆرمۆر کۆنترۆڵ کرا

ئاڤا نیوز

دوای 10 کاتژمێر لە ئاگرکەوتنەوە لە کێڵگەی غازی کۆرمۆر لە سنووری قەزای چەمچەماڵ لە پارێزگای سلێمانی، بەهۆی هێرشی مووشەکییەوە لە ڕێگەی پێنج تیمی ئاگرکوژێنەوە، ئاگرەکە کۆنترۆڵ کرا.

چیرۆکی سەرەکی: شەوی ڕابردوو کاتژمێر 11:30 خولەک بە درۆن هێرش کرایە سەر کێڵگەی کۆرمۆر لە چەمچەماڵ، بەهۆیەوە دوو کۆگای هەڵگرتنی غازی شل لەناو کێڵگەکە گڕی گرت و هەناردەکردنی غاز بۆ وێستگەکانی کارەبا وەستا، بەرهەمهێنانی کارەبا لە چوار هەزار مێگاواتەوە دابەزی بۆ هەزار مێگاوات و کارەبای زۆربەی شارەکانی هەرێمی کوردستان کوژایەوە.

زانیاریی پەیامنێر: بەپێی زانیارییەکانی ئارام جەمال، پەیامنێری ئاڤا لە کەرکووک، تیمەکانی ئاگرکوژێنەوە بۆ کۆنترۆڵکردنی ئاگرەکە زیاد کران، کاتژمێر 9:30 ئاگرەکە کۆنترۆڵ کرا، بەشێک لەو تانکەرانەی نەفتایان دەگواستەوە چوونەوە ناو کێڵگەکە.

ئەمەش بزانە: ڕووداوەکەی شەوی ڕابردوو لە کاتێکدایە، ڕۆژی دووشەممەی ئەم هەفتەیە جارێکی دیکە دوو درۆنی خۆکوژی بەسەر کێڵگەکەدا سوڕانەوە و دوای لێدانی زەنگی ئاگادار کردنەوە لەلایەن هێزە ئەمنییەکانەوە تەقەی لێ کراو دوور خرایەوە.