شاخەوان عەبدوڵڵا: سەرۆكی بەرەی توركمانی بە شێوەیەكی بەرنامەداڕێژراو هەوڵی ئاژاوەگێڕی لە کەرکووک دەدات

ئاڤا نیوز

جێگری سەرۆكی ئەنجوومەنی نوێنەرانی عێراق ڕایدەگەیێنێت، سەرۆكی بەرەی توركمانی بە شێوەیەكی بەرنامەداڕێژراو هەوڵی ئاژاوەگێڕی و ناسەقامگیری لە کەرکوک دەدات، داواشی لێ دەكات، شكست و دابەزینی دەنگەكانی حیزبەكەی لە دوایین هەڵبژاردن، بە نانەوەی پشێوی و دووبەرەكی لەنێوان پێكهاتەكان دانەپۆشێت و سنوورێك بۆ زێدەڕۆییەكانیان دابنێن.

گرفتەكە چییە: محەممەد سەمعان، سەرۆكی بەرەی توركمان، لەكاتی بانگەشەی هەڵبژاردن، وێنەیەكی خۆی لە گەڕەكی شۆرجە دانابوو، بەبێ ئەوەی خۆی كاندید بێت و ئەو گەڕەكەش تەواوی دانیشتووانەكەی كوردن و تەنانەت یەك دەنگدەری حیزبەكەی لەو گەڕەكە نین، ئەو كارەی بووە هۆی ئەوەی وێنەكەی بسووتێنرێت و گرژی دروست ببێت. هەر لەماوەی بانگەشەی هەڵبژاردن؛ لەسەر ڕێگەی بەغدا، لەلایەن ئەندامانی بەرەی توركمانی و بە ئاڕاستەكردنی محەممەد سەمعان، هێرشكرایە سەر كەژاوەی ئۆتۆمبێلی حیزبە كوردییەكان و هەوڵیاندا سووكایەتیی بە ئاڵای كوردستان بكەن و ئازاری گەنجە كوردەكان بدەن.

هاوكات لە شارۆچكەی پردێ، هەوڵیاندا هێرشبكەنە سەر گەنجێكی كورد و ئاڵاكەی لێ بسێنن و بیدڕن، ئەوكات لایەنە كوردییەكان بەهەماهەنگی لەگەڵ فەرماندەی ئۆپەراسیۆنەكانی كەركووك، لەپێناو پاراستنی سەقامگیری و ئارامی شارەكە، دۆخەكەیان هێور كردەوە. دواین هەوڵیش؛ لەڕێگەی ناردنی کۆمەڵێک گەنج و دانانی ئاڵای عێراق لە گەڕەکە کوردییەکان و نووسینی ناوی خۆی لەسەر ئاڵاکە بۆ دنەدانی گەنجانی کەرکووک؛ كە گومان دەكرێت هەر خۆیان ئاڵاكەیان سووتاندبێت بۆ دروستكردنی پشێوی و تێكدانی نێوانی پێكهاتەكان.

لێدوانی فەرمی: د. شاخەوان عەبدوڵڵا، جێگری سەرۆكی پەرلەمانی عێراق لە ئەژماری فەرمیی خۆی ڕایگەیاند، ماوەیەکە سەرۆکی بەرەی تورکمانی، بەشێوەیەکی بەرنامەداڕێژراو هەوڵی ئاژاوەگێڕی و ناسەقامگیری لە شاری کەرکوکدەدات، ئەو كردەوانە لەگەڵ پێگەی سەرۆكی حیزبێک ناگونجێت کە دەبێت ئەرکی لەپێشینەی؛ پاراستنی سەقامگیری و ئاسایشی کۆمەڵایەتی و برایەتی نێوان پێکهاتەکان بێت بەتایبەتی لە شارێکی وەک کەرکووک كە شاری فرە نەتەوە و ئاین و مەزهەبە.

شاخەوان عەبدوڵڵا ئاماژەی بەوەشكردووە، سەرۆكی بەرەی توركمانی، دوایین جار كۆمەڵێك گەنجی نارد و  ئاڵای عێراقیان بەرزکردەوە لە گەڕەكە كوردییەكان و نووسینی ناوی خۆی لەسەر ئاڵاكە بۆ ئیستفزازكردنی گەنجانی كەركووك، گومان دەكرێت هەر خۆیان ئاڵاكەیان سووتاندبێت بۆ دروستكردنی پشێوی و پێكدادانی پێكهاتەكان، دڵنیام بە چاوکراوەیی خەڵکی بەشەرەفی شارەكە لەسەرجەم پێکهاتەکان، ئەو خەونەی سەرۆکی جەبهەی تورکمانی لە گۆڕ دەنێین.

زانیاریی زیاتر: جێگری سەرۆكی پەرلەمانی عێراق داوا لە سەرۆكی بەرەی توركمانی دەكات، شکست و دابەزینی دەنگەکانیان لە دواین هەڵبژاردن، بە نانەوەی پشێوی و دووبەرەکی لەنێوان پێکهاتەکان دانەپۆشن و لەئاست بەرپرسیاریەتی و هەستیاری دۆخی شاری كەركووك بن و سنوورێک بۆ زیادەڕوییەکانیان دانێن .