لە زاخۆ 'پێشانگای دەلال' بۆ هەلی كار کرایەوە

ئاڤا نیوز

 

ئەمڕۆ پێنجشەممە 'پێشانگای دەلال' بۆ هەلی كار لە زاخۆ بە سپۆنسەری ئاڤا میدیا کرایەوە و تا كاتژمێر 4:00ـی  ئێوارە بەردەوام دەبێت.

 

چیرۆکی سەرەکی: پێشانگاکە بە ناونیشانی "پردی نێوان لێهاتوویی و دەرفەتەکان" لە زانکۆی زاخۆ لەلایەن کوردستان فاوندەیشن بە هاوبەشی لەگەڵ زانکۆی زاخۆ لە ڕێگەی (JOBS.KRD) بەڕێوەدەچێت، لە پێشانگەکەدا 30 کۆمپانیا لە بوارە جیاجیاکاندا بەشداری دەکەن.

لێدوانی فەرمی: جوان نەریمان یەکێک لە سەرپەرشتیاران و ڕێکخەرانی پێشانگاکە بە ئاڤای ڕاگەیاند: بۆ یەکەمجارە ئەم پێشانگایە لە زاخۆ دەکرێتەوە و زۆر بە باشی بەڕێوەدەچێت و گرنگی زۆری هەیە بۆ زاخۆ و وادەکات گەنجان بۆ دەستکەوتنی هەلی کار بە ئاسانی دەستییان بگات بە کۆمپانیاکان.

 

زانیاریی زیاتر: دەشڵێت، لەڕێگەی پلاتفۆڕمی (JOBS.KRD)، بە سێ زمان زیاتر هەزار و 900 هەلی کارمان ڕاگەیاندووە و 31 هەزار کەس داواکاری پێشکەش کردووە بۆ دەستکەوتنی هەلی کار.

 

ئەمەش بزانە: پێشانگاکە بۆ ماوەی یەک ڕۆژ بەردەوام دەبێت، لە ڕۆژی بەڕێوەچوونی پێشانگاکەدا بۆ دەرچووانی زانکۆ و کەسانی شارەزا 100 هەلی کار ڕاگەیێنراوە و ڕاستەوخۆ دەتوانن سیڤییەکان پێشکەشی کۆمپانیانکان بکەن. ئاڤا میدیا ستۆدیۆی لە پێشانگاکە هەیە و لە چەند گۆشەیەکی جیاوازەوە ڕووماڵی دەکات.

 

بەتەنیشت ئەم بابەتەوە: لە پێشانگاکەدا ستیەجێک دانراوە تیمێک هانی خەڵک دەدەن دەنگ بە هاندەرانی یانەی زاخۆ بدەن و هاوکاری و کارئاسانییان بۆ دەکەن بۆ ئەوەی خەڵاتی جیهانی "زە بێست" بۆ باشترین هاندەر بباتەوە کە ئەمڕۆ دوا ڕۆژی دەنگدانە و ئاڤا میدیا  بۆ ماوەی هەشت ڕۆژ کەمپەینی گەورەی لە هەرێمی کوردستان ڕاگەیاندووە.