سوودانی لەبارەی هێرشەکەی کۆرمۆر کۆبوونەوەیەکی خێرای کرد

ئاڤا نیوز

سەرۆکی ئەنجوومەنی وەزیران، فەرماندەی گشتیی هێزە چەکدارەکان محەممەد شیاع سودانی، سەرۆکایەتیی کۆبوونەوەیەکی بەپەلەی کرد و فەرمانی پێکهێنانی لیژنەیەکی لێکۆڵینەوەی دەرکرد.  

وێنە گەورەکە: شەوی ڕابردوو هێرشکرایە سەر کێڵگەی غازی کۆرمۆر لە سنووری قەزای چەمچەماڵ و لە ئەنجامدا ئاگرێکی گەورە لە کۆگایەکی غاز کەوتەوە، هێرشەکە هەرچەندە زیانی گیانی نەبوو، بەڵام بەهۆیەوە بەرهەمهێنانی کارەبای هەرێمی کوردستان بەڕێژەی 80% کەم بووەتەوە.

ڕاگەیێنراوی فەرمی: ئەمڕۆ چوارشەممە، سەباح نوعمان، وتەبێژی فەرماندەی گشتی هێزە چەکدارەکان ڕاگەیێنراوێکی بڵاوکردەوە و تیایدا هاتووە: سەرۆکی ئەنجوومەنی وەزیران، فەرماندەی گشتیی هێزە چەکدارەکان محەممەد شیاع سوودانی، سەرۆکایەتیی کۆبوونەوەیەکی بەپەلەی کرد بە ئامادەبوونی وەزیرانی بەرگری و ناوخۆ و سەرۆکانی دەزگا ئەمنییەکان، بۆ زانینی کاردانەوەکانی ئەم کارە ترسنۆکانە.

لە ڕاگەیاندراوەکەدا هاتووە "لایەنە تیرۆریستییەکان بە ئەنجامدانی هێرشێکی قێزەون بۆ سەر کێڵگەی نەوتی کۆرمۆر لە هەرێمی کوردستان عێراق كە دوێنێ شەو چوارشەممە ڕوویدا هەوڵی تێکدانی سەقامگیری وڵات دەدەن"

زانیاریی زیاتر: سوودانی فەرمانی پێکهێنانی لیژنەیەکی لێکۆڵینەوەی باڵای دەرکرد، بە سەرۆکایەتیی وەزیری ناوخۆ و ئەندامێتی هەر یەک لە سەرۆکی دەزگای هەواڵگریی نیشتمانی و وەزیری ناوخۆ لە هەرێمی کوردستانی عێراق، بە پاڵپشتی هاوپەیمانی نێودەوڵەتی و لیژنەیەکی تەکنیکی کە لە لایەنە پەیوەندیدارەکان لە فەرماندەیی ئۆپەراسیۆنە هاوبەشەکان لەخۆبگرێت، بۆ لێکۆڵینەوە لەم کارە و ئاشکراکردنی ئەو کەسانەی کە تێوەگلاون و پشتیووانیان دەکەن بۆ ئەوەی بەپێی یاسا لێپرسینەوەیان لەگەڵ بکرێت.