وادەی ناردنی پارە لەلایەن بەغدا و کاتی دابەشكردنی مووچەی مانگی نۆ

ئاڤا  نیوز

ڕێکارەکانی ناردنی مووچەی مووچەخۆرانی هەرێمی کوردستان لە بەغدا تەواوکراون، هاوکات بەرپرسانی حکومەتی عێراق و هەرێمی کوردستان کاتی نارد و دابەشكردنی مووچەی مانگی نۆ بۆ ئاڤا ئاشکرا دەکەن.

چیرۆکی سەرەکی: دوای نیوەڕۆی ئەمڕۆ پێنجشەممە، مووچەی مانگی نۆی مووچەخۆرانی هەرێمی کوردستان لەلایەن وەزارەتی دارایی عێراقەوە خەرجکرا و ڕێککارەکانی ناردنی تەواوکراون. 

لێدوانە فەرمیییەکان: بەرپرسێکی باڵای حکومەتی عێراق کە بەردەوام پەیوەندی لەگەڵ تەیف سامی هەیە، بە ئاڤای ڕاگەیاند، وەزارەتی دارایی عێراق نووسراوی خەرجکردنی مووچەی ئیمزاکردووە و ئیعازی ناردنی پارەی داوە.

هەر لەوبارەیەوە وەزارەتی دارایی کوردستان بە ئاڤای ڕاگەیاند، دوای دەوام بڕیاری خەرجکردنی مووچە دراوە، لەبەرئەوەی سیستەمی بانکی ناوەندیی عێراق داخراوە، وەرگرتنی پارە دەکەوێتە ڕۆژی یەکشەممە، ئەوکات پارەکە لە لقی کوردستانی بانقی ناوەندی وەردەگرین.

- دواتر خشتەی دابەشکردنی مووچە بڵاودەکەینەوە، خشتەکەش هاوشێوەی مانگی ڕابردووە و بە سێ ڕۆژ هەم بە کاش، هەم بە دیجیتاڵی لەڕێگەی هەژماری من دابەش دەکرێت.

لەلایەکی دیکەوە: تیمی هەژماری من بە ئاڤای ڕاگەیاند:  ئەگەر یەکشەممە زوو پارە بگات، ئەوا هەر یەکشەممە پارە بەسەر بانکەکان دابەش دەکرێت و لەوێشەوە دەخرێتە سەر حیسابی مووچەخۆران، بۆ ئێوارە دەست بە دابەشکردنی مووچە دەکەین.