وەزارەتی کارەبا لە ڕێگەی ئاڤا ئاشکرای دەکات کەی کارەبا ئاسایی دەبێتەوە

ئاڤا نیوز

وەزارەتی کارەبای هەرێمی کوردستان دوو مەرج بۆ ئاسایی بوونەوەی دۆخی پێدانی کاتژمێرەکانی کارەبای نیشتمانی بۆ ئاڤا ئاشکرا دەکات و باس لەوەش دەکات کە بەلایەنی کەمەوە 48 کاتژمێری پێویستە. 

چیرۆکی سەرەکی: درەنگانی شەوی چوارشەممەی ڕابردوو 26-11-2025 هێرش کرایە سەر کێڵگەی غازی کۆرمۆر لە سنووری قەزای چەمچەماڵ و لە ئەنجامدا ئاگرێکی گەورە لە کۆگایەکی غاز کەوتەوە، هێرشەکە هەرچەندە زیانی گیانی نەبوو، بەڵام بەهۆیەوە هەناردەی غاز بۆ وێستگەکانی کارەبا ڕاگیرا و ئاستی بەرهەمهێنانی کارەبا بەڕێژەی 80%  کەم کرایەوە.

زانیاریی زیاتر: لە زۆربەی ناوچەکانی کوردستان پێدانی کارەبا لە 24 کاتژمێرەوە بۆ پێنج بۆ شەش کاتژمێر دابەزیوە، ئەمەش لە کاتێکدایە کە ڕۆژانە 525 ملیۆن پێ سێجا غازی سرووشتی لە کۆرمۆر بەرهەم دەهێنرێت و بۆ 15 وێستگەی ناوخۆ دەنێردرێت.

لێدوانی فەرمی: وەزارەتی کارەبای هەرێمی کوردستان بە ئاڤای ڕاگەیاند: بۆ ئاسایبوونەوەی دۆخی کارەبای نیشتمانی بەلایەنی کەمەوە 48 کاتژمێرمان پێویستە، ئەمەش بە دوو مەرج: 

یەکەم: ئەگەر زیان تەنها بەر کۆگای هەڵگرتنی غازی کێڵگەی کۆرمۆر کەوتبێت و زیانەکان زیاتر نەبن، ئەمەش دوای گەڕانەوەی لیژنە هاوبەشەکە دەردەکەوێت.

دووەم: ئەگەر مەترسی نوێ دروست نەبێت و جارێکی تر هێرش نەکرێتەوە سەر کێڵگەکە.

لەلایەکی دیکەوە: کەمال محەممەد، وەزیری کارەبا لەبارەی ئاسایبوونەوەی دۆخی پێدانی کارەبای نیشتمانی ڕایگەیاند:  ئەگەر بە هۆی هێرشەکە تەنها خەزانەکانی هەڵگرتنی غاز زیانیان بەرکەوتبێت، پێشبینی دەکەین لە ماوەی 24 بۆ 48 کاتژمێری داهاتوودا دۆخەکە ئاسایی بێتەوە، ئێستاش دەتوانین ڕۆژانە تەنها 6 بۆ 8 کاتژمێر کارەبا بدەین.

لەبارەی کەمبوونەوەی غازی شلی ماڵان، وەزیری کارەبا دڵنیایی دا هیچ کێشەیەک لە بڕ و نرخی غاز ڕووینەداوە و گران نابێت.


نوێدەکرێتەوە..