بانکی ناوەندیی عێراق سێ هەژماری کۆمپانیای فلای بەغداد سڕدەکات

ئاڤا دیجیتاڵ

 

دوای ئەوەی وەزارەتی خەزێنەی ئەمریکا بەتۆمەتی "هاوکاریکردنی سوپای پاسداران و گرووپە میلیشیاکان" کۆمپانیای فلای بەغدادی خستە لیستی سزاکانییەوە، بانکی ناوەندیی عێراقیش هەژمارەکانی کۆمپانیاکەی لە سێ بانکی سەرەکی عێراق سڕکرد.

 

چیرۆکە سەرەکییەکە: "بەهۆی هاوکاریکردنی سوپای پاسدارانی ئێران و میلیشیا چەکدارەکانی عێراق، سووریا و لوبنان"، وەزارەتی گەنجینەی ئەمریکا کۆمپانیای فلای بەغدادی خستە لیستی سزاکانیەوە. هەر ئەوەش نا، بانکی ناوەندیی عێراقیش کۆمەڵێک "ڕێککاری تووند"ـی لە بەرامبەر ئەو کۆمپانیایە گرتەبەر.

 

لێدوانی فەرمی: "ئەمڕۆ سێشەممە 23-1-2024، بانکی ناوەندیی عێراق بڕیاری سڕکردنی هەژمارەکانی کۆمپانیای فلای بەغدادی لە سێ بانکی سەرەکی دا". سەرچاوەی ئەم زانیارییە میدیا عێراقییەکانن.

 

زانیاریی زیاتر: لەدوای سزاکانی ئەمریکا، هەر ئەمڕۆ سێشەممە 23-1-2024، کۆمپانیای فلای بەغداد لە ڕاگەیێنراوێکدا ئاماژەی بەوە کرد: "گەشتەکانیان بۆ ماوەی سێ ڕۆژی داهاتوو هەڵوەشاندوونەتەوە". بەڵام دیارنییە ئەم کارەی کۆمپانیاکە، بەهۆی سزاکانەوەیە یان لە کاردانەوەی بڕیارەکەی وەزارەتی گەنجینەی ئەمریکا و بانکی ناوەندیی عێراقە. ئاڤا میدیا زانیویەتی، ئەو گەشتانەی لە لایەن کۆمپانیای فلای بەغدادەوە هەڵوەشێنراونەتەوە بۆ دوبەی، بەیروت و ئیستەنبوڵ بوونە.

 

لە لایەکی دیکەوە: كۆمپانیای فلای بەغداد ڕەتیکردەوە لەو کارەدا تێوەگلابن و هاوکاری "سوپای پاسداران و میلیشیا چەکدارەکان"ـیان کردبێت، ڕاگەیەنراوێكیشی بڵاوکردەوە و داوای بەڵگەی لە وەزارەتی گەنجینەی ئەمریكا کرد. ڕاشیگەیاند: "سكاڵا تۆمار دەكەین و دەبێت قەرەبوو بکرێینەوە".

 

باکگراوند: ڕۆژی دووشەمە 22-1-2024، وەزارەتی گەنجینەی ئەمریكا كۆمپانیای فلای بەغدادی خستە لیستی سزاكانیەوە، ئەمەش  بەتۆمەتی ئەوەی هاوكاری "سوپای پاسدارانی ئێران و میلیشیا چەكدارەكانی  لە عێراق، سووریا و لوبنان" کردووە.