ئیسرائیل دەورووبەری دیمەشق بۆردومان دەکات

ئاڤا نیوز

بەرەبەیانی ئەمڕۆ هەینی، سوپای ئیسرائیل هێرشێکی ئاسمانییان کردە سەر شارۆچکەی "بەیت جین" لە دەورووبەری دیمەشق، بەهۆیەوە دوو کەس کوژراون و چەند کەسێکی دیکەش برینداربوون.

زانیاریی بەدەستهاتوو: بەگوێرەی میدیا عەرەبییەکان، دوای ئەوەی مەفرەزەیەکی هێزەکانی ئیسرائیل چوونەتە نێو "بەیت جین"ـەوە، شەڕ و پێکدادان لەنێوان دانیشتووانی شارۆچکەکە و هێزەکەدا ڕوویداوە، ئەمەش وایکردووە هێزەکەی ئیسرائیل لە نێو شارۆچکەکە بکشێتەوە و لە گردی "بات وەردە" لە دەورووبەری ناوچەکە جێگیر بێت.

زانیاریی زیاتر: لە بەشێکی دیکەی زانیاریەکاندا هاتووە، پاش کشانەوەی هێزەکەی، ئیسرائیل بە فڕۆکەی جەنگی شارۆچکەی "بەیت جین"ـی لە لادێکانی دیمەشق،  بۆردومان کردووە، لەئاکامدا دوو کەس  کوژراون و 11 کەسی دیکەش برینداربوون.

لەلایەکی دیکەوە: دەستەی پەخشی ئیسرائیل پشتڕاستی کردەوە کە سوپای وڵاتەکەی لە کاتی شەڕ و پێکدادانەکاندا لە "بەیت جین"، تۆپخانە و فڕۆکەی بێفڕۆکەوانی بەکارهێناوە و ئاماژەی بەوەشکردووە، دوای دوو کاتژمێر لە شەڕەکە، سوپای ئیسرائیل بۆ دەورووبەری شارۆچکەکە کشاوەتەوە.