ساڤایا: عێراق پێویستی بە چاکسازیی بنەڕەتی و جەوهەری هەیە

ئاڤا نیوز

نێردەی دۆناڵد ترەمپ بۆ عێراق، پشتیووانیی وڵاتەکەی بۆ دامەزراوە ئەمنییە "شەرعییەکانی" عێراق دووپات کردەوە و ئاماژەی بەوە کرد کە هاوبەشیی نێوان هەردوولا لە ساڵانی ڕابردوودا پێشکەوتنی بەدەست هێناوە.

ڕاگەیێنراوی فەرمی: مارک ساڤایا، نێردەی دۆناڵد ترەمپ،  لە هەژماری خۆی لە تۆڕی کۆمەڵایەتیی ئێکس نووسیویەتی: ئەمەریکا هەمیشە پشتیووانی لە دامەزراوە ئەمنییە شەرعییەکانی عێراق کردووە و پێشکەوتنی ڕاستەقینە لە بواری هاوکاری ئەمنی و سەربازی لەنێوان هەردوو وڵاتدا بەدەست هاتووە، بەڵام لە هەمان کاتدا هۆشداریدا لەوەی عێراق پێویستیی زۆر بە ئەنجامدانی چاکسازیی بنەڕەتی هەیە.

زانیاریی زیاتر: ساڤایا ئاماژەی بەوەکرد، کۆمپانیا ئەمەریکییەکان کە بە بەهای ملیارەها دۆلار کەلوپەل و پشتیووانییەکی زۆریان پێشکەش عێراق کردووە، هێشتا وەک هاوبەشی سەرەکی لە پرۆسەی بەهێزکردنی ئاسایش و سەروەریی عێراقدا دەمێننەوە .

ئەوەی پێویستە بیزانیت: مارک ساڤایا بازرگانێکی ویلایەتی میشیگانی ئەمریکایە و  تەمەنی 40 ساڵە، هاووڵاتییەکی کلدانی ئەمریکییە و بنەچەی دەگەڕێتەوە بۆ کلدانەکانی عێراق و لە بواری پیشەسازی گژوگیادا کاری کردووە و لە هەڵمەتەکانی ساڵی 2024ـی ترەمپدا بۆنە و چالاکیی ڕێکخستووە کە پاڵپشتی لە کۆمەڵگەی عەرەبی - ئەمریکی و کلدانی لە ویلایەتەکەی بۆ ترەمپ کۆکردووەتەوە.