هەزاران کۆچبەر لە شارێکی لیبیا خۆیان حەشارداوە

ئاڤا نیوز

سەرۆکی لقی دەزگای بەرەنگاربوونەوەی کۆچبەرانی نایاسایی لە شاری جەفرەی لیبیا ئاشکرای کرد، نزیکەی 20 هەزار کۆچبەری نایاسایی لە سنووری شارەکەیاندا هەیە و بەشێکیشیان هەڵگری نەخۆشیی گواستراوەن.

وێنە گەورەکە: بەهۆی ئەوەی سنووری ئاوی لەگەڵ ئیتاڵیا هەیە، خەڵکێکی زۆر لە وڵاتانی ڕۆژهەڵاتی ناوەڕاست ڕێگای لیبیا بەکاردێنێت بۆ گەیشتن بە ئەوروپا، بەڵام بە یەکێک لە ڕێگا مەترسیدارەکان دادەنرێت و ساڵانە سەدان کوردیش لەو ڕێگا دەستگیر دەکرێن و دەگەڕێنرێنەوە بۆ کوردستان.

لێدوانی فەرمی: لیوا عەلی غەیس، سەرۆکی لقی دەزگای بەرەنگاربوونەوەی کۆچبەرانی نایاسایی لە شاری جەفرەی لیبیا ڕایگەیاند: نزیکەی 20 هەزار کۆچبەری نایاسایی لە سنووری شاری جەفرە هەن و ژمارەیەک لەو کۆچبەرانەش هەڵگری نەخۆشی گواستراوەن، ئەمە لە کاتێکدایە کە هیچ بەڵگەنامەیەکی فەرمی و ڕێکارێکی یاسایی مانەوەیان پێ نییە.

زانیاریی زیاتر: ئەو بەرپرسە ئاماژەی بەوەشکرد، لە ماوەی ڕابردوودا، دوو هەزار کۆچبەری نایاساییان دەستگیرکردووە و گواستراونەتەوە بۆ سەنتەرەکانی مانەوە لە ناوچەکانی شاتی، سەبها و سەرت، ئەوەش وەک ئامادەکارییەک بۆ ناردنەوەیان بۆ وڵاتەکانی خۆیان.

ژمارەکان وادەڵێن: بەگوێرەی ڕاپۆرتێکی ڕۆژنامەوانی، ژمارەی کۆچبەرانی نایاسایی لە سەرانسەری لیبیا گەیشتووەتە 867 هەزار و 55 کۆچبەر، زۆربەیان خەڵکی سوودانن بە ڕێژەی 33%، دواتر نەیجیریا بە ڕێژەی 22%، میسر بەڕێژەی 19% و  چاد بە ڕێژەی 10%، زۆرینەی ئەو کۆچبەرانە لە ناوچەکانی ڕۆژئاوای لیبیا جێگیر بوون.