پرۆژەی ڕووناکی لە ڕێگای ئاڤاوە ڕوونکردنەوە لەبارەی گەڕانەوەی کارەبا و هەڵکردنی مۆڵیدەکان دەدات

ئاڤا نیوز

دوای هێرشە مووشەکییەکەی سەر کێڵگەی کۆرمۆر، هەوڵەکان چڕکراونەتەوە بۆ گەڕانەوەی کارەبای نیشتمانی بۆ باری ئاسایی خۆی، مۆلیدە ئەهلییەکانی گەڕەکیش سەرپشک کراون لە هەڵکردنی مۆلیدەکانیان.

چیرۆکی سەرەکی: شەوی 26ـی مانگ، چوارشەممەی هەفتەی ڕابردوو کاتژمێر 11:30، بە مووشەک هێرشکرایە سەر کێڵگەی غازی کۆرمۆر لە چەمچەماڵ، بەهۆیەوە 525 ملیۆن پێ سێجا غازی ڕۆژانە وەستا و بەرهەمهێنانی سێ هەزار مێگاوات کارەبا ڕاگیرا، ئەمەش وایکرد بەرهەمهێنانی کارەبای نیشتمانی داببەزێت و پێدانی کاتژمێرەکانی کارەبا لە ڕۆژێکدا بۆ پێنج کاتژمێر کەمببێتەوە.

لێدوانی فەرمی: سەرچاوەیەک لە پڕۆژەی ڕووناکی تایبەت بە ئاڤای ڕاگەیاند: کارەبای نیشتیمانی لەماوەی 24 کاتژمێری داهاتوودا دەگەڕێتەوە و ڕێگری لە هیچ خاوەن مۆلیدەیەک نەکراوە بۆ هەڵکردنی مۆلیدەکانیان.

زانیاریی زیاتر: بەگوتەی سەرچاوەکە، لە هیچ شار و شارۆچکەیەک ڕێگری لە خاوەن مۆلیدەکانی گەڕەک نەکراوە مۆلیدەکانیان کارپێبکەن، پڕۆژەی ڕووناکی ڕێگر نابێت لە هەڵکردنی مۆلیدەکان.

لەلایەکی دیکەوە: ئەردەلان دۆسکی، بەڕێوەبەری گشتیی دیوانی وەزارەتی کارەبای حکومەتی هەرێمی کوردستان، بە ئاڤای ڕاگەیاند: هاووڵاتیان دڵنیا دەکەینەوە بەخێرایی کێشەکە چارەسەر دەکرێت، وێستگەکەش چاککراوەتەوە و لەماوەیەکی نزیک کارەبا دەگەڕێتەوە باری ئاسایی خۆی.

سەبارەت بە کارپێکردنی مۆلیدە ئەهلییەکانیش گوتی، کەس ڕێگری لە خاوەن مۆلیدەکان نەکردووە کارەبا بە هاوڵاتیان بدەن بەڵکو داوامان لێ کردوون کارەبا بدەنە هاوڵاتییان، بەشێکیشیان وەک ئەرکێکی مرۆڤایەتی خۆیان کارەبا دەدەن بەبێ ئەوەی خۆمان پێیان بڵێن ئەمەش جێگای دەستخۆشییە.