وەزارەتی کارەبای عێراق: هەناردەی غازی ئێران بۆ عێراق وەستا

ئاڤا نیوز

 

وەزارەتی کارەبای عێراق ڕایدەگەیەنێت، ماوەی سێ ڕۆژە بەهۆی چاکسازییەوە هەناردەی غازی ئێران بۆ عێراق بە تەواوی وەستاوە و بڕیارە چوار ڕۆژی دیکە دەستپێدەکاتەوە. 

 

چیرۆکی سەرەکی: لایەنی ئێرانی بە فەرمیی وەزارەتی کارەبای عێراقی ئاگادارکردووەتەوە کە بەهۆی کاری چاکسازی لە بۆرییە گواستراوەکانی غاز لەناو خاکی ئێران، هەناردەی غاز بۆ ماوەی هەفتەیەک بەتەواوی دەوەستێت. تاوەکو ئێستا سێ ڕۆژ بەسەر وەستانی غازەکەدا تێپەڕیوە و بڕیارە دوای چوار ڕۆژی دیکە و تەواوبوونی چاکسازییەکان، هەناردەکردن دەستپێبکاتەوە.

 

لێدوان فەرمی؛ ئەحمەد موسا، وتەبێژی وەزارەتی کارەبا ڕایگەیاند: وەزارەتی کارەبا بۆ ئەوەی رێگە لە کەم بوونەوەی کاتژمێرەکانی پێدانی کارەبا بگرێت، پەنای بۆ بەکارهێنانی سووتەمەنیی بەدیلی خۆماڵی بردووە بۆ وێستگەکان، بەڵام ئەم چارەسەرە وێستگەکانی (مەنسورییە، سەدری غازی و بەسمایە) ناگرێتەوە، چونکە ئەو وێستگانە تەنیا لەسەر غاز کار دەکەن."

 

ئەوەی پێویستە بیزانیت: عێراق بۆ بەگەڕخستنی دوو لە سەر سێی وێستگەکانی کارەبا، پشت بە هاوردەی غازی ئێرانی دەبەستێت و ئەمریکاش بەردەوامە لە گوشارەکانی تاوەکو عێراق لە دابینکردنی وزە سەربەخۆ بێت، بۆیە بەخشینەکانی کڕینی غازی ئێرانی لەسەر عێراق هەڵگرت.