ڕاپۆرتی سەرەتایی بۆ لێکۆڵینەوە لە هێرشەکەی سەر کۆرمۆر گەیشتووەتە دەست سوودانی

ئاڤا نیوز

 

لێژنەیەکی باڵا لەگەڵ دوو لیژنەی تەکنیکی و هەواڵگری، لێکۆڵینەوە لە هێرشەکەی کۆرمۆر دەکەن و  ڕاپۆرتی سەرەتایی گەیشتووەتە دەست محەممەد شیاع سودانی، سبەی شەممە ئەو 72 کاتژمێرە کۆتایی دێت کە بۆ لێکۆڵینەوە لە هێرشەکە و ڕاگەیاندنی ئەنجامەکەی دەستنیشان کرابوو.

 

وێنە گەورەکە: ئەو لێژنە باڵایەی بە بڕیاری محەممەد شیاع سودانی، سەرۆکوەزیرانی عێراق کە لە هەمان کاتتدا فەرماندەیی گشتیی هێزە چەکدارەکانی عێراقە پێكهات بۆ لێكۆڵینەوە لە هێرشەكەی سەر كێڵگەی غازی كۆرمۆر، هەریەک لە عەبدولئەمیر شەمەری وەزیری ناوخۆی عێراق، حەمید شەتری سەرۆکی دەزگای هەواڵگریی نیشتمانیی عێراق، ڕێبەر ئەحمەد وەزیری ناوخۆی هەرێمی کوردستان، سەردانی كێڵگەكەیان كرد و بە ئامادەبوونی تیمێكی پسپۆڕی سەربازی و ئەمنی و نوێنەری كۆمپانیای دانە غاز كۆبوونەوەیەکیان ئەنجامدا و بڕیاردرا بەدواداچوون بۆ هەموو وردەکارییەکی هێرشکردنکە بکرێت. 

 

زانیاریی پەیامنێر: ڕاپۆرتی سەرەتایی و هەڵسەنگاندنی لێژنە باڵای لێکۆڵینەوە لە هێرشەکەی سەر کێڵگەی غازی کۆرمۆر گەیشتووەتە محەممەد شیاع سودانی، چاوەڕوانی ڕاپۆرتی هەردوو لیژنەی تەکنیکی و هەواڵگریین کە هێشتا سەرقاڵی لێکۆڵینەوەن و ئەمڕۆ و سبەی کاتیان لەبەر دەست ماوە، بەپێی زانیارییە سەرەتاییەکان، هێرشی یەکەم لەڕێگەی درۆنەوە بووە، هێرشی دووەم لەڕێگەی مووشەکی گراد ئەنجامدراوە.

 

زانیاریی زیاتر: بۆ جاری یازدەمینە هێرش دەکرێتە سەر کێڵگەی غازی کۆرمۆر، جگە لە پێشێلکردنی سەروەرییەکانی هەرێمی کوردستان، جیاواز لە جارانی پێشوو هێرشەکەی ئەمجارە زیانێکی زۆری بە خەزانی غاز گەیاندووە و بەهۆیەوە نزیکەی سێ هەزار مێگاوات ئاستی بەرهەمهێنانی کارەبا لە ڕۆژێکدا دابەزیوە، بەمەش ڕێژەی پێدانی کاتژمێرەکانی کارەبای نیشتیمانی لە سەرانسەری هەرێمی کوردستان کەم بووەوە، بۆیە فشارێکی زۆری ناوخۆیی و نێودەوڵەتی لەسەر حکومەتی عێراقە کە دەبێت ئەنجامی لێکۆڵینەوەکان بۆ ڕای گشتی ئاشکرا بکرێن، ناوی ئەو کەس و لایەنانەش ڕابگەیێنرێت کە هێرشەکەیان ئەنجامداوە، بۆئەوەی جارێکی دیکە دووبارە نەبێتەوە.