زانیاریی ئاڤا: چوارچێوەی هەماهەنگی دەرگای خۆپاڵاوتنی بۆ سەرۆک وەزیران داخست

ئاڤا نیوز

 

چوارچێوەی هەماهەنگی بە فەرمی کۆتایی بە وەرگرتنی سیڤی و پلانی کاندیدەکان بۆ پۆستی سەرۆکوەزیران هێنا، سەرچاوەیەکی باڵاش ئاشکرای دەکات کە 45 کەسایەتی خۆیان بۆ ئەو پۆستە پاڵاوتووە.

 

وێنە گەورەکە: ئەمڕۆ شەممە، لیژنەی تایبەت بە هەڵسەنگاندنی کاندیدەکان، کە عەمار حەکیم سەرۆکایەتی دەکات و هەریەکە لە هومام حەمودی و ئەبو کەرار فەرەیجی تێیدا ئەندامن، سێ مەرجی سەرەکییان بۆ کاندیدەکان دانابوو. یەکەم: دیاریکردنی پێنج ئەولەویەتی سەرەکی بۆ کارکردن، دووەم: پێشکەشکردنی ناوی ئەو تیمەی لە نووسینگەی سەرۆکوەزیران کاری لەگەڵ دەکەن، سێیەم: دانانی پلانێکی ڕوون و ورد بۆ جێبەجێکردنی ئەو ئەولەویەتانە.

 

لێدوان فەرمی: سەرچاوەیەکی باڵا لە چوارچێوەی هەماهەنگی بە ئاڤا میدیای ڕاگەیاند: "لیژنەکە بە شێوەیەکی بنبڕ داواکاری ژمارەیەک کاندیدی ڕەتکردووەتەوە کە دەیانویست چوارچێوەی هەماهەنگی خۆی ئەولەویەت و پلانەکانیان بۆ بنووسێتەوە، چونکە هەر کەسێک بیەوێت حکومەت بەڕێوەببات دەبێت خۆی خاوەنی دیدگا و پلان بێت".

 

لە لایەکی دیکەوە: هاوکات لەگەڵ لیژنەی هەڵبژاردنی کاندیدەکان، لیژنەیەکی دیکەی دانوستانکار پێکهێنراوە کە پێکهاتوون لە (نوری مالیکی، هادی عامری، ئەحمەد ئەسەدی و فالح فەیاز)، ئەرکی ئەم لیژنەیە گفتوگۆکردنە لەگەڵ هێزە سیاسییەکانی سوننە و کورد بە مەبەستی پێکهێنانی حکومەتی نوێ.

زانیاریی زیاتر: پێوەرەکانی لیژنەی هەڵبژاردن بۆ کاندیدی سەرۆکوەزیران جەخت لەسەر چەند خاڵێکی سەرەکی دەکەنەوە، لەوانە: دەستپاکی، ئەزموون، توانای دروستکردنی سازان و ڕێککەوتن، لەگەڵ توانای ئەنجامدانی چاکسازیی بەپەلە.