سووننەکان لە یەکلاییکردنەوەی کاندیدی سەرۆکی پەرلەمان نزیک دەبنەوە

ئاڤا نیوز

 

ئەندامێکی ئەنجوومەنی سیاسیی سووننەکان دەڵێت، لە چەند ڕۆژی داهاتوودا کاندیدی سەرۆکی پەرلەمان یەکلایی دەکەنەوە و لە یەکەمین دانیشتنی پەرلەماندا دەنگی لەسەر دەدرێت، جەختیش دەکاتەوە لەوەی بەگرنگی دەزانن کاندیدەکەیان لای هەموو لایەنەکانی دیکەش قبووڵکراو بێت.

 

وێنە گەورەکە: چاوەڕێ دەکرێت تاوەکو کۆتایی مانگی داهاتوو سەرجەم ڕێکارەکانی پەیوەست بە هەڵبژاردن تەواوبکرێن و دادگای فیدراڵیش ناوی کاندیدە براوەکانی خولی شەشەمی پەرلەمانی عێراق پەسەند بکات، لە هەنگاوی دواتریشدا سەرۆکی پەرلەمان لە پشکی سووننەکان و سەرۆککۆمار لە پشکی کورد هەڵدەبژێردرێت، دواتریش سەرۆککۆمار کاندیدی گەورەترین فراکسیۆنی پەرلەمان بۆ پێکهێنانی حکومەت ڕادەسپێرێت.

 

لێدوانی فەرمی: عەممار عەزاوی، ئەندامی هاوپەیمانیی سیادە کە بەشێکە لە ئەنجوومەنی سیاسیی سووننەکان ئەمڕۆ یەکشەممە بە ڕۆژنامەی سەباحی ڕاگەیاند، ئەنجوومەنی سیاسیی سووننەکان لە چەند ڕۆژی داهاتوودا کاندیدی خۆی بۆ پۆستی سەرۆکی پەرلەمان یەکلایی دەکاتەوە.

 

ئەوەشی خستووەتەڕوو، ئامانج لەو هەنگاوەشیان بۆ ئەوەیە تا لە یەکەم دانیشتنی پەرلەماندا سەرۆکایەتیی پەرلەمان هەڵبژێدرێت و پرۆسەی کاراکردنی پەرلەمان و پێکهێنانی حکومەت خێراتر بکرێت.