لاهوور شێخ جەنگی سەرکردایەتیی حزبەکەی بۆ گفتوگۆکردن لەگەڵ پارتی ڕاسپاردووە

ئاڤا نیوز

 

سەرۆکی تیمی پارێزەرانی لاهوور شێخ جەنگی ڕایگەیاند، لاهوور شێخ جەنگی سەرکردایەتیی حزبەکەی بۆ گفتوگۆکردن لەگەڵ شاندی پارتی ڕاسپاردووە.

 

وێنە گەورەکە: بڕیارە ئەم هەفتەیە شاندی پارتی دیموکراتی کوردستان بۆ گفتوگۆکردن لەسەر پرسی پێکهێنانی کابینەی نوێی حکومەتی هەرێمی کوردستان سەردانی لایەنە سیاسییەکان بکات.

 

لێدوانی فەرمی: بورهان ڕەشید گوڵە، سەرۆکی تیمی پارێزەرانی لاهوور شێخ جەنگی بە ئاڤای ڕاگەیاند: ڕۆژی چوارشەممەی پێشوو سەردانی لاهوور و پۆڵادی برایم کرد و تەندروستیان باش بوو.

 

لەلایەکی دیکەوە: سەرۆکی تیمی پارێزەرانی لاهوور شێخ جەنگی وتی: لاهوور شێخ جەنگی ئەندامانی سەرکردایەتیی حزبەکەی ڕاسپاردووە، ئەگەر شاندی پارتی لەسەر پێکهێنانی حکومەت سەردانیکردن ئەوا دانوستانیان لەگەڵ بکەن، ئەگەر دانوستانەکەیان بەدڵبوو ئەوا بەشداریی حکومەت بکەن.

 

زانیاریی زیاتر: ئەندامانی سەرکردایەتیی بەرەی گەل بۆ گفتوگۆکردن لەگەڵ شاندی پارتی پێکهاتوون لە: ژینۆ محەممەد، سۆران جەمال تاهیر، شادمان مەلا حەسەن، فێنک ئەحمەد ئەحمەد، ڕێبوار جاف.