فوئاد حوسێن: بکەرانی هێرشەکەی کۆرمۆر ناسراون و چەکی گرنگییان هەیە

ئاڤا نیوز

 

وەزیری دەرەوەی عێراق دەڵێت، ئەوانەی هێرش دەکەنەسەر کێڵگەی غازی کۆرمۆر لە ڕاپۆرتەکانی پێشتردا دیاریکراون و ناسراون، ئاشکراشی دەکات کە ئەو گرووپە چەکی گرنگ و پێشکەوتوویان لەبەردەستە و پێویستە حکومەت ڕێکاریان بەرامبەر بگرێتەبەر.

 

لێدوانی فەرمی: فوئاد حوسێن، وەزیری دەرەوەی عێراق شەوی ڕابردوو لە چاوپێککەوتنێکی تەلەفیزیۆنیدا باسی لەوە کرد، "ڕوونە ئەوەی کراوە [هێرشەکەی سەر کۆرمۆر] کارێکی تیرۆرستییە و هێرشەکەش لە ناوخۆدا کراوە، بۆ زانینی بکەرانیشی دەبێت چاوەڕێی ڕاپۆرتی لێکۆڵینەوە بکەین".

 

وتیشی، "لە ڕاپۆرتی هێرشەکانی پێشتردا کە ئێستا لای حکومەتی عێراقە ناوی کەس و لایەنە هێرشکارەکە هەیە، بەڵام بەداخەوە حکومەت ڕاپۆرتەکەی بڵاونەکردەوە، پێم وایە ئەگەر ڕاپۆرتەکە بڵاوکرابووایەوە و ڕێکار بگیرایەتەبەر، ئەم هێرشەی دوایی ڕووینەدەدا و دووبارە نەدەبووەوە".

 

لەبارەی ئەو گرووپەش کە هێرشەکەی ئەم دواییەی سەر کێڵگەی غازی کۆرمۆری ئەنجامداوە، وەزیری دەرەوەی عێراق ئەوەی خستەڕوو، "لایەنەکە ناسراوە و ئەو لایەنەی هێرشەکەی ئەنجامداوە گرووپێکە کە چەکی گرنگ و پێشکەوتووی هەیە".

 

باکگراوند: شەوی چوارشەممەی ڕابردوو هێرشکرایە سەر کێڵگەی غازی کۆرمۆر لە سنووری قەزای چەمچەماڵ و لە ئەنجامدا ئاگرێکی گەورە لە کۆگایەکی غاز کەوتەوە، هێرشەکە هەرچەندە زیانی گیانی نەبوو، بەڵام بەهۆیەوە بەرهەمهێنانی کارەبای هەرێمی کوردستان بەڕێژەی 80% کەم بووەوە.