سێیەمین لوتکەی BIP بۆ ئابووری و وەبەرهێنان لە هەولێر بەڕێوەدەچێت

ئاڤا نیوز

وا بڕیارە سبەی دووشەممە 1-2-2025، سێیەمین لوتکەی BIP بۆ ئابووری و وەبەرهێنان لە هۆتێل دیڤانی شاری هەولێر بەڕێوەبچێت و ماوەی دوو رۆژ بەردەوام دەبێت.

وێنە گەورەکە: لوتکەی "BIP بۆ وەبەرهێنان"، ئامانج لێی کۆکردنەوەی وەرهێنەران و کۆمپانیا گەورەکانی ئەو بوارەیە بۆ ئەوەی ئاڕاستە بکرێن بۆ ناوچەیەکی دیاریکراوە بۆ دۆزینەوەی دەرفەتی وەبەرهێنان. 

لێدوانی فەرمی: ڕامیار ئەرسەلان، بەڕێوەبەری کارگێڕی BIP بە ئاڤا میدیای گوت: لەو لوتکەیە هەوڵدەدەین وەبەرهێنەران بهێنینە کوردستان تاوەکو وەبەرهێنان بکەن چونکە ناوچەکە لە گۆڕانکاری و بەهێزکردنی ژێرخانی دەنێت و ئارامییەکی باش بۆ جێبەجێکردنی ئەو بوارە هەیە. 

- ئەم لوتکەیە دەرگایەکی گەورە بۆ هەرێمی کوردستان دەکرێتەوە و کار لەسەر ئەوە دەکەین ئەو وەبەرهێنەرانە بهێنین کە خواستیان هەیە لە هەرێمی کوردستان وەبەرهێنان بکەن.

زانیاریی پەیامنێر: کوردستان حەسەن، پەیامنێری دیبلۆماسی ئاڤا میدیا گوتی: ئامادەکاری تەواو بۆ بەڕێوەچوونی لوتکەکە کراوە، میوانەکان ئەمڕۆ لە ڕێگەی فرۆکەخانەی نێودەوڵەتیی هەولێر دەگەنە شاری هەولێر، لە لوتکەکەدا ژمارەیەک پانێل و دیدار و گفتوگۆی گرنگ بەڕێوەدەچن.

- ژمارەیەک کۆمپانیای گەورە و وەبەرهێنەر و خاوەنکاران لە وڵاتانی ناوچەکە و کەنداو و ئەوروپا و جیهان بەشداری دەکەن.

ئەوەی پێویستە بیزانیت: بە سپۆنسەری ئاڤا میدیا، سێیەمین " لوتکەی BIP بۆ ئابووری و وەبەرهێنان" بەڕێوەدەچێت، لوتکەکە بە پاڵپشتی حکومەتی هەرێمی کوردستان و بە سەرپەرشتی دەستەی وەبەرهێنان، کارەکانی ئەنجام دەدرێن.

زانیاریی زیاتر: زیاتر لە 15 هۆڵدینگ لە هەرێمی کوردستان و عێراق و نزیکەی 15 هۆڵدینگ و گرووپ لە 13 وڵات جیاواز و 50 گەورە کۆمپانیای جیهان بەشداری دەکەن، پێشبینی دەکرێت ئەمساڵ بە بەهای 275 ملیۆن دۆلار سەرنجی وەبەرهێنەران بۆ وەبەرهێنان لە کوردستان ڕابکێشرێت.

باکگراوند: لوتکەی یەکەم و دووەمی BIP لە وڵاتی ئیمارات بەڕێوەچوو، کۆمەڵێک ڕێککەوتن و لێکتێگەیشتن لە نێوان کۆمپانیاکان ئەنجامدران، لە لوتکەی یەکەم بە بەهای 100 ملیۆن دۆلار و  لە لوتکەی دووەم بە بەهای 350 ملیۆن دۆلار سەرنجی وەبەرهێنەران ڕاکێشرا.