عەرەبی هاوردە زەویی جووتیارانی کورد دەکێڵن

ئاڤا نیوز

 

 لە گوندی (عەلە غیر) لە سنووری کەرکووک، عەرەبە هاوردەکان بە بەرچاوی هێزە ئەمنییەکانەوە و بە ڕۆژی ڕووناک، دەستیان بەسەر زەوی و زاری جوتیارانی کورددا گرتووە و دەستیان بە کێڵانی کردووە، ئەمەش هاوکاتە لەگەڵ ڕوخاندنی خانووی دانیشتووانی ڕەسەنی گوندەکە.

 

بەدواداچوونی ئاڤا: بەپێی زانیارییەکان و بەڵگەکان، پێشێلکارییەکان تەنها کێڵانی زەوییە کشتوکاڵییەکان نییە، بەڵکو عەرەبە هاوردەکان تەنانەت ئەو ناوچانەشیان کێڵاوە کە بە "موحەرەمە" (ناوچەی قەدەغەکراو) ناسراون و موڵکی گشتین و نابێت کاری کشتوکاڵییان تێدا بکرێت.

بەپێی ئەو بەڵگانەی دەستکەوتوون، عەرەبە هاوردەکان پشت بە گرێبەستی کشتوکاڵی دەبەستن بۆ کێڵانی زەوییەکان، لەکاتێکدا سەرجەم ئەو گرێبەستانە بە بڕیاری فەرمی هەڵوەشاوەتەوە و هیچ بنەمایەکی یاساییان نەماوە. سەرەڕای ئەوەش، سوپا و هێزە ئەمنییەکان بێدەنگییان هەڵبژاردووە بەرامبەر ئەم دۆخە.

زانیاریی زیاتر: جووتیارانی کورد دۆخەکە بە مەترسیدار وەسف دەکەن و بە "تەعریبکردن بە فۆڕمێکی سەردەمیانە" ناوی دەبەن. لە کۆی 29 هەزار دۆنم زەوی جوتیارانی کورد لەو سنوورە، عەرەبی هاوردە دەستی بەسەر زیاتر لە 18 هەزار دۆنمیدا گرتووە و خەریکی کاری کشتوکاڵین تێیدا.