ئەنجوومەنی باڵای دادوەری 428 تانەی ئەنجامی هەڵبژاردنەکان یەکلایی دەکاتەوە

ئاڤا نیوز

ئەنجوومەنی باڵای دادوەری، یەکلاکردنەوەی 428 تانەی لە کۆی 853 تانە لە ئەنجامەکانی هەڵبژاردنی پەرلەمان ڕاگەیاند، کە لە 11ـی تشرینی دووەم بەڕێوەچوو.

وێنە گەورەکە: نزیکەی سێ هەفتە بەسەر ئەنجامدانی هەڵبژاردنەکانی ئەنجوومەنی نوێنەرانی عێراق تێپەڕ دەبێت، ئەگەرچی ژمارەیەکی زۆری تانە لە ئەنجامەکان تۆمارکراون، بەڵام هێشتا ئەو تانانە هیچیان لە دۆخی دەنگ و کورسییەکان نەگۆڕیووە.

ڕاگەیێنراوی فەرمی: بەگوێرەی ڕاگەیێنراوێک کە لەلایەن ئەنجوومەنی باڵای دادوەرییەوە دەرچووە و وێنەیەکی دەست "ئاڤا" کەوتووە، "دەستەی دادوەریی هەڵبژاردنەکان 428 تانەی لە کۆی 853 تانە یەکلاکردووەتەوە، لەکاتێکدا 425 تانە ماونەتەوە و لە ڕۆژانی داهاتوودا یەکلایی دەکرێنەوە".

بەتەنیشت ئەو بابەتەوە: پێشتر، کۆمیسیۆنی باڵای هەڵبژاردنەکانی عێراق ڕایگەیاندبوو کە تاوەکو ئێستا 207 تانە لە ئەنجامەکانی هەڵبژاردن ڕەتکراونەتەوە.

ئەوەی لەبارەیەوە دەگوترێت: جومانە غەلای، وتەبێژی کۆمیسیۆن ڕایگەیاند: "دەستەی دادوەری تا ئێستا 207 تانەی لە ئەنجامەکانی هەڵبژاردن ڕەتکردووەتەوە".

ئەوەی پێویستە بیزانیت: پێشتریش کۆمیسیۆن جەختی لەوە کردبووەوە کە زۆربەی ئەو تانانەی سەبارەت بە دوایین هەڵبژاردنی پەرلەمان پێشکەشکراون، بەڵگەی پێویستیان نییە.