زیاتر لە 850 عێراقی کەمپی هۆل جێدەهێڵن

ئاڤا نیوز

لەژێر چاودێری و سەرپەرشتی هێزەکانی ئەمریکا، زیاتر لە 850 هاووڵاتی عێراقی لە کەمپی هۆلی سووریا ، دەگەڕێنرێنەوە عێراق و بەرەو کەمپی جەدعە بەڕێ دەکرێن.

وێنە گەورەکە: کەمپی هۆل، گەورەترین کەمپی ژن و منداڵی خێزانەکانی داعشە لە ڕۆژئاوای کوردستان، بەگوێرەی نوێترین ئامارەکان، ئێستا زیاتر لە 30 هەزار کەسی تێدا ماوە، تا ئێستاش عێراق توانیویەتی نزیکەی 19 هەزار هاووڵاتی خۆی بگەڕێنێتەوە وڵاتەکە.

زانیاریی بەدەستهاتوو: سەرچاوەیەکی ئاگادار لە سووریا بە میدیای عێراقی ڕاگەیاند، "هەموو ڕێکارە کارگێڕی و لۆجستییەکان بۆ گواستنەوەی گرووپێکی نوێی عێراقییەکان لە کەمپەکەوە بۆ عێراق تەواو بوون." بڕیارە عێراق بەرەبەیانی سبەی دووشەممە زیاتر لە 20 پاس بەرەو سووریا بنێرێت، بەمەبەستی گواستنەوەیان.

پێدراوە ڕاستەکان: پێشتر وەزارەتی کۆچ و کۆچبەرانی عێراق ڕایگەیاندبوو، گرووپێکی نوێی عێراقییەکان لە کەمپی هۆلەوە دەگەڕێنەوە. بەپێی وتەی عەلی جیهانگیر، وتەبێژی وەزارەتەکە، نزیکەی سێ هەزار هاووڵاتی عێراقی هێشتا لە کەمپەکەدان و بڕیارە لە سێ گرووپی دیکەدا بگوازرێنەوە.

ئەوەی پێویستە بیزانیت: نەتەوە یەکگرتووەکان لەگەڵ بەغدا کاردەکات بۆ کۆتاییهێنان بە بوونی هەر خێزانێکی عێراقی لە کەمپی هۆل تا ساڵی 2027. ئەو کەسانەی دەگەڕێنەوە، سەرەتا بۆ کەمپی جەدعە لە مووسڵ دەگوازرێنەوە بۆ دووبارە شیاندنەوەیان و پاشان بۆ ناوچەکانی خۆیان.