ئاڤای خەڵک؛ بەشداربووانی پڕۆژه‌یه‌کی نیشته‌جێبوون له‌ هه‌ولێر پاره‌یان داوه‌ و شووقه‌یان وه‌رنه‌گرتووه

ئاڤا نیوز

چوار ساڵە لە هەولێر نزیکەی 200 هاووڵاتی پارەی پێشەکی شووقەیان بە پڕۆژەیەکی نیشتەجێبوون داوە، بەڵام تاوەکو ئێستا بەردی بناغەی پڕۆژەکەش دانەنراوە. پڕۆژەکە ناوی گۆڵدن تاوەرزە، دەکەوێتە سەر شەقامی 150 مەتری.

زانیاریی بەدەستهاتوو: یەکێک لە کڕیارانی شووقەکان بە ئاڤای وت، بەڵێننامەیەکمان پڕکردەوە دەبوو لە 30 مانگدا شووقەکانمان ڕادەست بکرێت، ئەگەر لەو ماوەیەش دواکەوێت دەبوو کۆمپانیا پارەی تەواومان بداتەوە، بەڵام ئێستا چوار ساڵ تێپەڕیوە و پڕۆژەکە دەستی پێ نەکردووە.

زانیاریی زیاتر: بەپێی نووسراوێکی بەڕێوەبەرایەتی گشتی وەبەرهێنانی هەولێر، پڕۆژەکە بە بڕیاری ئەوان و بەهۆی چەند تێبینییەکەوە لە مانگی 2ـی ساڵی 2024 ڕاگیراوە.

لێدوانی فەرمی: بەرگەشت ئاکرەیی، وتەبێژی دەستەی وەبەرهێنانی هەرێمی کوردستان بە ئاڤای ڕاگەیاند، بەهۆی کێشە لەنێوان دوو وەبەرهێنەر کارەکانی پڕۆژەکە ڕاگیراوە، ئێستا لیژنەیەک لە دەستەی وەبەرهێنان و بەڕێوەبەرایەتیی گشتیی وەبەرهێنانی هەولێر پێکهێنراوە و سەرقاڵی چارەسەرکردنی کێشەکەین، ئەو خەڵکەش کە یەکەکانیان کڕیوە خەمیان نەبێت، ناهێڵین مافی کەس بفەوتێت.