ئاڤای خەڵک؛ گەڕەکی حەمرین لە کەلار ئاوەڕۆی نییە و ئاوی خواردنەوەی سوێر بووە

ئاڤا نیوز

گەڕەکی حەمرین لە کەلار تاوەکو ئێستا ئاوەڕۆی نییە و نزیکەی شەش مانگە ئاوی خواردنەوەشیان سوێر بووە و کەڵکی بەکارهێنانی نەماوە.

زانیاریی بەدەستهاتوو: دانیشتوویەکی گەڕەکەکە بە ئاڤای وت، بەهۆی نەبوونی ئاوەڕۆ، ئاوی زێرابی ماڵان کۆدەبێتەوە، لەبەر بۆنی ناخۆشی ئەو ئاوە ژیانمان نەماوە.

دانیشتوویەکی دیکەی گەڕەکەکە دەڵیت، ئەوە چەند مانگە ئاوی پاکمان نەماوە، ئاوەکەمان بردووە بۆ تاقیگە وتوویانە نەک بۆ خواردنەوە بۆ خۆشۆردنیش نابێت.

لێدوانی فەرمی: دلێر حوسێن، بەرپرسی بەشی پرۆژەکانی شارەوانی کەلار بە ئاڤای وت، ئەو گەڕەکە خۆی زێدەڕۆیە بۆیە پڕۆژەیان بۆ نەکراوە، لەگەڵ کارگەکانی ناوچەی پیشەسازی قسەمان کردووە بۆ دروستکردنی ئاوەڕۆیەک، بەشێک لە ماڵەکان دەخرێنە سەر ئەوە و هەوڵدەدەین بەشەکەی دیکەش چارەسەر بکەین.

بۆ کێشەی ئاوی خواردنەوەش، سامان ڕەحیم، بەڕێوەبەری ئاوی کەلار بە ئاڤای وت، لە هەوڵداین لەڕێگای ڕاکێشانی بۆرییەکەوە ئاوی خواردنەوەی پاک بۆ گەڕەکەکە دابین بکەین.