تاقیکردنەوە و هەڵسەنگاندن بۆ کۆمپانیاکانی حەج و عومرە دەکرێت

ئاڤا نیوز

بەڕێوەبەرایەتی گشتیی حەج و عومرەی کوردستان بە مەبەستی تاقیکردنەوە و هەڵسەنگاندن، کۆمپانیاکانی حەج و عومرە ئاگادار دەکاتەوە. لە ئەگەری ئامادەنەبوونیان مافی چوونیان بۆ حەج نابێت.

وێنە گەورەکە: ئامادەکارییەکانی بەڕێوەبەرایەتی گشتیی حەج و عومرەی کوردستان بۆ بەجێگەیاندنی پڕۆسەی حەجی ساڵی داهاتوو بەردەوامە، سەدان کۆمپانیاش ناویان تۆمارکراوە بۆ ڕاییکردنی کارەکانی پڕۆسەی حەجخوازان.

لێدوانی فەرمی: کاروان ستوونی، وتەبێژی حەج و عومرەی کوردستان بە ئاڤا میدیای ڕاگەیاند، ئاگاداری سەرجەم خاوەن کۆمپانیاکانی حەج و عومرە دەکەینەوە، ئەوانەی لە دەروازەی ئەلیکترۆنی حەج داواکارییان پێشکەش کردووە بە مەبەستی هاوەڵیکردنی حاجییانی کوردستان لەوەرزی حەجی 2026، تاقیکردنەوە و هەڵسەنگاندنیان بۆ دەکرێت. لە ئەگەری ئامادەنەبوونیان، مافی چوونیان بۆ حەج نابێت.

وتەبێژی حەج و عومرەی کوردستان، داوا لەو خاوەن کۆمپانیایانەش دەکات کە ئێستا لە گەشتی عومرەن، ئاگاداری مۆبایلەکانیان بن، چونکە وەکو هاوکارییەک تاقیکردنەوەکە بە شێوەی ئۆنلاین بۆیان دەکرێت.

ئەوەی پێویستە بیزانیت: لە رۆژانی سێشەممە و چوارشەممە ڕێککەوتی 2 و 3ـی 12، لە مزگەوتی سەواف تاقیکردنەوە و هەڵسەنگاندنی کۆمپانیاکانی پارێزگای هەولێر و دهۆک و ئیدارە سەربەخۆکانی سۆران و زاخۆ بەرێوەدەچێت.

رۆژی چوارشەممە ڕێکەوتی 03-12-2025، تاقیکردنەوە و هەڵسەنگاندنی کۆمپانیاکانی پارێزگای سلێمانی و هەڵەبجە و ئیدارە سەربەخۆکانی ڕاپەرین و گەرمیان دەکرێت.