ڕێنمایی پێدانی زەوی بۆ زیندانیانی سیاسی هەموار دەکرێتەوە

ئاڤا نیوز

وەزارەتی شارەوانی و گەشتوگوزار ڕێنمایی پێدانی زەوی بۆ زیندانیانی سیاسیی هەموار کردووەتەوە و ئەوانەی پێشووتر زەوییان وەرگرتووە بە سوودمەند بوو هەژمار ناکرێن.

وێنە گەورەکە: بەگوێرەی ڕێنمایی ژمارە دووی ساڵی 2024ـی پەیوەست بە دابەشکردنی زەوی بەسەر فەرمانبەران و خانەنشینان، نابێت پێشووتر بەهەر هۆکارێک لە وەرگرتنی زەوی سوودمەند ببن، بەڵام ئەوە بۆ زیندانیانی سیاسیی هەموار کراوەتەوە.

لێدوانی فەرمی: سەربەست مەولوود، سەرپەرشتیاری تیمی وردبینی و ڕێکخستنی فۆڕمی دابەشکردنی زەوی له‌ وه‌زاره‌تی شاره‌وانی بە ئاڤای ڕاگەیاند، "بەگوێرەی ڕێنماییە نوێیەکە زیندانیانی سیاسیی دەتوانن فۆڕمی وەرگرتنی زەوی پڕبکەنەوە و سوودمەند ببن، بەو مەرجەی خۆیان فەرمانبەر بن، ئەو زەوییەی پێشووتر وەریانگرتووە بەناوی زیندانی سیاسیی وەریانگرتبێت.

ئەمەش بزانە: بە هەموارکردنەوەی ئەو ڕێنماییە سەرووی هەزار فەرمانبەری دیکە سوودمەند دەبن لە وەرگرتنی زەوی، تەنیا خۆیان دەتوانن فۆڕم پڕبکەنەوە و ئەوانەی لە ژیاندا نەماون وارسەکانیان ناتوانن لەبری ئەوان سوودمەند بن.