لە بەسرە بەهۆی کەمی باڵەخانە ژمارەیەک قوتابخانە کراونەتە سێ دەوامی

ئاڤا نیوز

ئەم هەفتەیە چەندین دایبابی قوتابییان هەڵیانکوتاوەتە سەر قوتابخانەیەکی ناوەندیی کچان لە پارێزگای بەسرە، ئەمەش دوای ئەوەی دەوامی قوتابخانەکە کراوەتە سیستەمی سێ دەوامی بەهۆی نەبوونی قوتابخانە و پۆلی پێویست، داوا دەکەن دەوامی منداڵەکانیان ڕێکبخرێتەوە.

چیرۆکی سەرەکی: چالاکوانێکی مەدەنی بەناوی عەلا محەممەد و ژمارەیەک لە دایک و باوکانی قوتابییان هەڵیانکوتایە سەر باڵەخانەی قوتابخانەی پیشەیی بەسرەی کچان، لەگەڵ دەیان قوتابیی قوتابخانەکە ناڕەزایەتییان دەربڕی بەرامبەر بە کارکردنی قوتابخانەی ناوەندیی خەنسا بۆ کچان کە بە سیستەمی سێ دەوامی کاردەکات.

 

ئەمەش دوای بڕیاری دابەشکردنی قوتابخانەی ئامادەیی پیشەیی بەسرە بۆ کچان بۆ دوو قوتابخانەی جیاواز بەهۆی زیادبوونی زۆری ژمارەی قوتابییان و خواستێکی بەرفراوان بۆ خوێندنی پیشەیی لەم ساڵدا.

ڕاگەیێنراوی فەرمی: بەڕێوەبەرایەتیی پەروەردەی بەسرە ڕایگەیاند: زۆربەی قوتابخانەکانمان سیستەمی سێ دەوام پەیڕەو دەکەن بەهۆی ئەو گوشارەی کە لە ئەنجامی زۆریی ژمارەی قوتابییانەوە دروست دەبێت، ئەم بڕیارە دەکەوێتە چوارچێوەی دەسەڵاتی کارگێڕی و ڕێکخراوەیی بەڕێوەبەرایەتییەکە.

بەڕێوەبەرایەتییەکە سکاڵا دژی چالاکوانەکە تۆمار دەکات و ئاماژەی بەوەشکردووە، "رێکاری یاسایی دەگرنەبەر و ئەو چالاکە مەدەنییە و هەرکەسێک کە زیانی بە بەڕێوەبەرایەتییەکە گەیاندبێت یان دەستوەردانی لە کارەکانیدا کردبێت دەدرێنە دادگا و دەسەڵاتی دادوەریش ناوبژیوانی کۆتایی دەبێت لەو بابەتەدا.