جێگری وەزیری دەرەوەی ئەمریکا گەیشتە بەغدا

ئاڤا نیوز

بەیانیی ئەمڕۆ دووشەممە، جێگری وەزیری دەرەوەی ئەمریکا  گەیشتە بەغدا و بڕیارە لەگەڵ بەشێک لە بەرپرسانی عێراق کۆببێتەوە.

چیرۆکی سەرەکی: ئەمڕۆ دووشەممە، مایکڵ ڕیگاس، جێگری وەزیری دەرەوەی ئەمریکا گەیشتە بەغدا و لەلایەن جۆشوا هاریس، هەڵسوڕێنەری کاروباری باڵیۆزخانەی ئەمریکا پێشوازیی لێ کرا.

ڕاگەیێنراوی فەرمی: باڵیۆزخانەی ئەمریکا لە بەغدا ڕایگەیاند: ئەم سەردانە پەیوەندییەکانی ئەمریکا و عێراق بەهێز دەکات بە پەیوەندیکردن لەگەڵ سەرکردەکان و کۆمەڵگا ناوخۆییەکان بۆ پشتگیریکردن لە ئامانجە هاوبەشەکانی سەروەری و خۆشگوزەرانی.

زانیاریی زیاتر: بەگوێرەی ڕاگەیێنراوی پێشووی وەزارەتی دەرەوەی ئەمریکا، ڕیگاس چەندین دیدار لەگەڵ بەرپرسانی باڵای عێراق ئەنجام دەدات بۆ گفتوگۆکردن لەسەر هاریکاریی سیاسی و ئابووری و ئەمنی.

ئەو کات وەزارەتی دەرەوە ئەوەشی دووپات کردەوە، ڕیگاس دواتر سەردانی هەولێر دەکات و بەشدار دەبێت لە کردنەوەی کونسوڵخانەی نوێی وڵاتەکەی لە هەولێر.

ئەمەش بزانە: سەردانەکەی ناوبراو پێش گەیشتنی مارک ساڤایا، نێردەی تایبەتی دۆناڵد ترەمپ، سەرۆکی ئەمریکایە بۆ عێراق کە بڕیارە لە چەند ڕۆژی داهاتوودا ئەنجام بدرێت.