دوو پەیکەری سەری مرۆڤ لە باکووری کوردستان دەدۆزرێنەوە و جیهان سەرسام دەکات

ئاڤا نیوز

دۆزینەوەی دوو پەیکەری سەری مرۆڤ لە پارێزگای ڕۆحای باکووری کوردستان کە لە بەرد هەڵکۆڵراون و مێژووەکەیان بۆ 10 هەزار و 500 ساڵ لەمەوبەر دەگەڕێتەوە، بووەتە هەواڵی گەرمی میدیا جیهانییەکان.

چیرۆکی سەرەکی: تا دێت ناوچەی گرێ مرازا لە ڕوحا بە دۆزینەوەی شوێنەواری مێژوویی دیکە، جیهان زیاتر سەرسامی خۆی دەکات و لە میانی بەردەوامی کارەکانی کنە و پشکنین، دوو پەیکەری سەری مرۆڤ دۆزراونەتەوە کە بە شێوەیەکی ئێجگار هونەرییانە لە بەرد هەڵکۆڵراون.

لێدوانی فەرمی: پڕۆفیسۆری یاریدەدەر دکتۆر ئەمرە گولدۆغان، سەرۆکی تیمی پشکنین و مامۆستا لە بەشی شوێنەوارناسی بەر لە مێژوو لە زانکۆی ئیستانبووڵ ئاماژە بەوە دەدات، ڕووخساری ئەم دوو پەیکەرە تازە دۆزراوەیە، زۆر لە هی پەیکەرە دۆزراوەکانی ئەو سەردەمە جیاوازە.

بەتەنیشت ئەم بابەتەوە: لەو دوو پەیکەرەدا بە شێوەیەکی زۆر تایبەت بیلبیلەی چاو، دەوروبەری چاو، برۆ، گوێ، لووت و دەم لەسەر بەردەکان هەڵکۆڵراون و ئەمەش دەری دەخات لە سەردەمی دێرین و چاخی بەردیش کوردستان هەمیشە مەڵبەند و کانگای هونەری شێوەکاری بووە.