چەند پارچە شوێنەوارێکی سێ هەزار ساڵە لە گردێکی هەولێر دەدۆزرێنەوە

ئاڤا نیوز

لە قۆناغی یەکەمی کنە و پشکنین بۆ گردی شوێنەواری عەلی مەولان لە دارەتوو، چەند پارچەیەک چاپی مۆر و گڵێنە دۆزرانەوە کە مێژووەکەیان بۆ سێ هەزار ساڵ بەر لە زایین دەگەڕێنەوە.

وێنە گەورەکە: لە شاری هەولێر کنە و پشکنین بۆ چەندین گرد و شوێن بەردەوامە، بەشێکی زۆری ئەو شوێنانە لەلایەن تیمی زانکۆکانی وڵاتانی ئەوروپا و ڕۆژئاوا دەکرێن.

لێدوانی فەرمی: ئاودێر نەسرەدین، ئەندامی تیمی کنە و پشکنین لە گردی عەلی مەولان بە ئاڤای وت، وەرزی یەکەمی کنە و پشکنین بە هاوبەشی نێوان بەڕێوەبەرایەتی گشتی شوێنەواری هەولێر و سەنتەری کامنێسی ئیتاڵی کۆتاییپێهات و مانگی چواری ساڵی داهاتوو وەرزی دووەمی هەڵکۆڵین دەستپێدەکاتەوە و پرۆسەکە بە چەند قۆناغێک بۆ ماوەی چەند ساڵێک بەردەوام دەبێت. ئەو تیمە نموونەی دۆزراوەی خۆڵیان لەگەڵ خۆیان بردووەتەوە بۆ ئیتاڵیا، ئەو خۆڵە ماددەی ئەندامی و نائەندامی تێدایە، لە تاقیگەکانی ئەو وڵاتە لێکۆڵینەوەی لەسەر دەکرێت.

ئاودێر نەسرەدین ئەوەشی گوت، لە گردی شوێنەواری عەلی مەولان، چەندین پارچەی شوێنەواری وەک مۆر و گڵێنە (دەفری گڵی) دۆزراونەتەوە مێژوویان بۆ سەردەمی نەینەوا فایڤ و کۆتیی سەردەمی کالکۆلسک دەگەڕێتەوە. هەریەکەیان مێژووەکەیان سێ هەزار ساڵ پێش زایین دەبێت، واتا زیاتر لە پێنج هەزار ساڵ لەمەوبەر.

زانیاریی زیاتر: لەبارەی چارەنووسی ئەو پارچە شوێنەواریانەی دەدۆزرێنەوە، بەڕێوەبەرایەتی شوێنەواری هەولێربە ئاڤایان وت؛ ئەو پارچانەی دەدۆزرێنەوە، سەرەتا دەبرێنە کۆگای شوێنەوار و لەوێ تا کاتی ساغکردنەوەیان لەناو سندووقێک هەڵدەگیرێن و دواتر کە لێکۆڵینەوەکان کۆتاییان هات، لە مۆزەخانە نمایش دەکرێن.