سەرۆک بارزانی پاڵپشتی لە سەرخستنی هەوڵەکانی ڕەوەندی کوردستانی دەکات

ئاڤا نیوز

سەرۆک بارزانی پێشوازی لە بەرپرسی نووسینگەی پەیوەندییە نێودەوڵەتییەکانی کۆنفیدراسیۆنی ڕەوەندی کوردستانی کرد و پاڵپشتیی خۆیشی بۆ سەرخستنی هەوڵەکانی ڕەوەندەکە دەربڕی کە لە پێناوی دۆزی ڕەوای گەلی کوردستان ئەنجامیانداوە.

چیرۆکی سەرەکی: ئەمڕۆ دووشەممە 1-12-2025، لە پیرمام سەرۆک مەسعود بارزانی پێشوازی لە ڕەحیم ڕەشید کە ناسراوە بە (مستەر کورد) بەرپرسی نووسینگەی پەیوەندییە نێودەوڵەتییەکانی کۆنفیدراسیۆنی ڕەوەندی کوردستانی کرد.

ڕاگەیێنراوی فەرمی: بارەگای بارزانی ڕایگەیاند، لە دیدارەکەدا، سەرۆک بارزانی باسی لە ڕۆڵ و پێگەی ڕەوەندی کوردستانی و پێویستی تێکۆشانی نەتەوەیی لە دیاسپۆرا کرد، هەروەها ڕۆڵی ڕەوەندەکەی بە گرنگ وەسف کرد لەپێناو پێشخستنی دۆزی ڕەوای گەلی کورد.

سەرۆک بارزانی پشتیوانی و پاڵپشتی خۆشی بۆ سەرخستنی هەوڵەکانی ڕەوەندی کوردستانی نیشاندا و ئاماژەی بەوەدا کە ئەمە پڕۆژەیەکی نەتەوەیی و نیشتیمانییە بۆ هەموو کوردستانیان.

زانیاریی زیاتر: هەر لەو دیدارەدا بەرپرسی نووسینگەی پەیوەندییە نێودەوڵەتییەکانی کۆنفیدراسیۆنی ڕەوەندی کوردستانی تیشکی خستە سەر ئەو کار و چالاکیانەی کە لەئاستی نێودەوڵەتیدا لە پێناو دۆزی ڕەوای گەلی کوردستان ئەنجامیانداوە.