هۆشیار زێباری: دەستمان بە ڕێکخستنی نێو ماڵی کورد کردووە

ئاڤا نیوز

هۆشیار زێباری، ئەندامی مەکتەبی سیاسیی پارتی دیموکراتی کوردستان ڕایدەگەیێنێت، دەستیان بە "ڕێکخستنی نێوا ماڵی کوردی" کردووە لەگەڵ لایەنە کوردییەکانی دیکە بۆ چارەسەرکردنی پرسی پۆستی سەرۆککۆمار، ئاماژە بەوەش دەکات کە "ئەگەر ئەم سێ ماڵە ( کورد و سوننە و شیعە) پێکەوە کۆببنەوە، پێموایە کارەکە ئاسانتر دەبێت، بەڵام هێشتا ڕێگەیەکی درێژمان لەپێشە."

وێنە گەورەکە: تاوەکو ئێستا هیچ یەکێک لە پێکهاتە سەرەکییەکانی عێراق کورد، سوننە و شیعە لەسەر کاندیکردنی ناوێک نەگەیشتوونەتە بڕیاری کۆتایی و گفتوگۆکانیش لەبارەی یەکلاییکردنەوەی کاندیدێک بۆ ئەو پۆستانە بەردەوامە.

چیرۆکی سەرەکی: ڕۆژی دووشەممە 1ـی 12، هۆشیار زێباری لە پانێڵێکدا لە "چاتەم هاوس" ڕایگەیاند، "ماراسۆنی سیاسی لە عێراقدا دەستیپێکردووە و دوای پەسەندکردنی ئەنجامەکان چڕتر دەبێتەوە." ئاماژەی بەوەشدا کە "نەخشەی سیاسی دوای هەڵبژاردنەکان نیشانەی پێکهێنانی حکومەتێکی خێرا نادات."

ئەوەی پێویستە بیزانیت: زێباری جەختی کردەوە کە "خاڵی دەستپێک ڕێککەوتن دەبێت لەسەر سەرۆککۆمار و سەرۆکی پەرلەمان، پاشان سەرۆککۆمار سەرۆکوەزیران دیاری دەکات." هەروەها وتی: "بە گشتی هێشتا ڕێککەوتنێک نییە لەسەر کاندیدی داهاتوو بۆ سەرۆکایەتی، بەڵام وەک کورد لەسەر یەک شت کۆکین کە پۆستەکە دەبێت بۆ کاندیدی کورد بێت وەک گەرەنتییەک بۆ سیستەمی سیاسی."

لەهەمان کاتدا: زێباری وتی: "پێکهێنانی ئەنجوومەنی سیاسیی نیشتمانی لەناو سەرکردە سوننەکاندا دەستیپێکردووە و ئێمە پێشوازیی لێدەکەین و پشتگیری دەکەین." ئاماژەی بەوەشدا کە "چوارچێوەی هەماهەنگیش مەرجی خۆیان هەیە لەسەر ئەوەی کێ دەبێتە سەرۆکوەزیران."