وەڵامی لقی دووی پارتی بۆ مەڵبەندی سێی یەکێتی: کە ماڵتان لە شوشەیە، بەرد لە ماڵی کەس مەگرن

ئاڤا نیوز

لقی دووی پارتی دیموکراتی کوردستان وەڵامی مەڵبەندی سێی یەکێتیی نیشتمانی کوردستان دەداتەوە و دەڵێت: "دەتانەوێت بەم شێوە شکستی هەڵبژادن بشارنەوە، وا باشترە کە ماڵتان لە شوشەیە، بەرد لە ماڵی کەسی تر نەگرن".

 
چیرۆکی سەرەکی: لەسەر گرژی و ئاڵۆزییەکانی گوندی لاجان، لقی دووی پارتی دیموکراتی کوردستان، وەڵامی مەڵبەندی سێی یەکێتی دایەوە، دوای ئەوەی مەڵبەندی سێ یەکێتی ڕاگەیاند:" یه‌كه‌مجاره‌ ده‌وڵه‌ت ڕووبه‌ڕووی گوندێكی خۆی ببێته‌وه".

ڕاگەیێنراوی فەرمی: لە ڕاگەیێنراوەکەدا هاتووە: یەکێتی وەک ئەوەی هەنگوینییان لە دار دۆزیبێتەوە دەیانەوێت شکستییان لە دوایین هەڵبژاردن لە هەولێر بە ناوهێنانی پارتی و دامەزراوەکانی حکومەت لە بیر خەڵک ببەنەوە، دیارە وەک قوباد تاڵەبانی گووتەنی هێشتا (لە جەوی هەڵبژاردن ماون).

- مەڵبەندی یەکێتی دەبێت ئەوەی لەبیر بێت کاتێک بە بڕیاری سەرۆکی حزبەکەی دەبابە و کۆپتەر و چەکی قورسی لە شەقامەکانی شاری ئازیزی سلێمانی، خرانە بەرژەوەندی کەسی و یەکلاییکردنەوەی هەژموونی دوو ئامۆزا ئەوەشیان ئازادی بوو؟!

- کاتێک گەنجانی حیزبەکەی خەڵتانی خوێن کرد و قەتل و عامیان لە لالەزار بەرپاکرد، ئەوکات ڕەچاوکردنی بنەماکانی مافی مرۆڤ بوو؟!

- ئەی ئێستا کە سێ سەرۆکی حزبی ئۆپۆزیسیۆنتان لە زیندانەکانی سلێمانی ئاخنیوە، ئەوەیان ناوی چی لێ دەنێن؟

- ئەی ئەو فیتنە و ئاژاوەگێڕییەی کەناڵەکانتان دەیکەن بۆ نەمانی کارەبا و تەقاندنەوەی کێڵگەی غازی کۆرمۆر و بەئامانجگرتنی ژێرخانی ئابووری هەرێمەکەمان چ مانایەکی هەیە ئەو دڵخۆشیەتان لەپای چی ؟!.


- " وا باشترە ئیتر مەڵبەندی یەکێتی و کەناڵ و سێبەر و دەست و پێوەندەکانیان بێ دەنگ بن و دڵنیابن ئەو فیتنە و ئاژاوەگێڕییەی هەردوو برا سەرکردەکانتان دەیکەن، جگە لە نەمانی متمانە لای خەڵکی کوردستان، هیچ سوودێکی تری نییە و مێژوو شاهێدە و چەند ڕۆژێکە ئەنجامی هەڵبژاردنتان بینیوە و خەڵکی کوردستان هۆشیارە بۆیە وا باشترە کە ماڵتان لە شوشەیە، بەرد لە ماڵی کەسی تر نەگرن.

- ئەوەی لە چەند ڕۆژی ڕابردوو ڕوویدا لە هێرشکردنە سەر کێلگەی کۆرمۆر تا ئەم ڕووداوەی گوندی لاجان هەوڵێکی دوژمنکارانەیە بۆ لێدان لە ژێرخانی ئابووری هەرێمی کوردستان و بەئامانجگرتنی، لە پێناوی تاکە ئافەرینێکی هاوئاواز و هاوپەیمانەکانیان کە ئامانجیان نەمانی کوردستان و تێکدانی سەقامگیرییەکەیەتی.