عێراق بۆ بەڕێوەبردنی یەکێک لە گەورەترین کێڵگە نەوتییەکانی بانگهێشتی کۆمپانیا ئەمریکییەکان دەکات

ئاڤا نیوز

دوای ئەوەی کۆمپانیای لۆک ئۆیلی ڕووسی کارپێکەری سەرەکی کێڵگەی ڕۆژئاوای قوڕنە-2 لە پارێزگای بەسڕە لەلایەن ئەمریکاوە سزای بەسەردا سەپێنرا، ئەمڕۆ وەزارەتی نەوتی عێراق بانگهێشتی کۆمپانیا ئەمریکییەکانی کرد تا بێن و ئەو کێڵگە نەوتییە بەڕێوەبەرن.

ئەوەی پێویستە بیزانیت: کێڵگەی ڕۆژئاوای قوڕنە لەڕووی یەدەگی نەوتییەوە، گەورەترین کێڵگەی نەوتی عێراقە و 14 ملیار بەرمیل نەوتی یەدەگی دۆزراوەی هەیە، ئێستاش ڕۆژانە 480  هەزار بەرمیل نەوتی تێدا بەرهەم دەهێنرێت و کۆمپانیای لۆک ئۆیلی ڕووسی بەڕێوەی دەبات، بەڵام لەدوای سەپاندنی سزاکانی ئەمریکا بەسەر ئەو کۆمپانیا ڕووسییەدا، دەنگۆی ئەوەی بڵاوکرایەوە کە کۆمپانیای ئێکسۆن مۆبیلی ئەمریکی پشکەکانی لۆک ئۆیل لە کێڵگەی ڕۆژئاوای قوڕنە-2 دەكڕێتەوە.

ڕاگەیێنراوی فەرمی: وەزارەتی نەوتی عێراق لە ڕاگەیێنراوێکدا باسی لەوەکردووە، بۆ بەردەوامیدان بە بەرهەمهێنانی نەوت، وەزارەتی نەوت ڕاستەوخۆ و بەتایبەت بانگهێشتی کۆمپانیا گەورەکانی ئەمریکا دەکات تا بێن و لە پرۆسەی بەڕێوەبردنی کێڵگەی ڕۆژئاوای قوڕنە-2 بەشداربن، ئەوەش خزمەتی بەرژەوەندییەکانی بەغدا و واشنتن دەکات و هۆکارێکیش دەبێت بۆ گواستنەوەی تازەترین تەکنەلۆژیای ئەمریکی لە بەڕێوەبردن و بەرهەمهێنانی نەوت بۆ عێراق.

لەلایەکی دیکەوە: مانگی ڕابردووش  ئاژانسی ڕۆیتەرز لە زاری سەرچاوە ئاگادارەکانەوە گواستییەوە کە کۆمپانیای ئێکسۆن مۆبیل سەرقاڵی تاوتوێکردنی کڕینی پشکەکانی کۆمپانیای لۆک ئۆیلی ڕووسییە لە کێڵگەی نەوتی ڕۆژئاوای قوڕنە 2 لە عێراق.

هۆکارە زانراوەکان: وەزارەتی خەزێنەی ئەمریکا مۆڵەتی بە کۆمپانیاکان داوە بۆ دەستپێکردنی گفتوگۆ لەگەڵ لۆک ئۆیل، کە ئەم مۆڵەتە تا 13ی کانوونی یەکەم بەردەوام دەبێت. ئەمەش بووەتە هۆی زیادبوونی لیستی ئەو کۆمپانیایانەی کە ئارەزووی کڕینی پشکەکانی لۆک ئۆیل دەکەن.