کۆمیسیۆن سەرجەم سکاڵاکان دژی کورسی پێکهاتەکان ڕەتدەکاتەوە

ئاڤا نیوز

کۆمیسیۆنی باڵای سەربەخۆی هەڵبژاردنەکانی عێراق سێ سکاڵای دژی سێ کاندیدی دەرچووی پێکهاتەکان بۆ پەرلەمانی عێراق ڕەتکردەوە و ڕاست و دروستی دەنگە بەدەستهاتووەکانیانی پەسەند کرد.

وێنە گەورەکە: یەکێک لە کاندیدە سەرکەوتووەکان کە چاوی زۆری لەسەر بوو، حەیدەر عەلی ئەبو تارە کاندیدی سەرکەوتووی کورسی کۆتای کوردی فەیلی بوو لە پارێزگای واست، ناوبراو لە هەڵبژاردنە پەرلەمانییەکەی مانگی ڕابردوودا 17 هەزار و 188 دەنگی بەدەستهێنا و بۆ پەرلەمان سەرکەوت، بۆیەش لەلایەن چەند کەس و لایەنێک سکاڵا لە کۆمیسیۆن تۆمارکرا بە پاساوی ئەوەی ناوبراو لە بنەڕەتدا کوردی فەیلی نییە و داوای ڕەتکردنەوەی دەنگەکانی ئەبو تارە کرا.

ڕاگەیێنراوی فەرمی: ئەنجوومەنی کۆمیسیاران لە کۆمیسیۆنی باڵای سەربەخۆی هەڵبژاردنەکانی عێراق ئەمڕۆ دووشەممە لەسەر سکاڵای کەسێک بەناوی حەمزە عەبدولحوسێن سوزە کۆبووەوە کە دژی حەیدەر عەلی ئەبو تارە تۆماری کردبوو، کۆمیسیۆن دەڵێت، بەگوێرەی نوسراوی فەرمی وەزارەتی کۆچ و کۆچبەرانی عێراق، حەیدەر عەلی ئەبو تارە سەر بە پێکهاتەی کوردانی فەیلییە، بۆیەش سکاڵا دژی ئەو کاندیدە سەرکەوتووەی پەرلەمانی عێراق ڕەتکرایەوە.

کۆمیسیۆن سکاڵایەکی دیکەی نوێنەری بزووتنەوەی بابلیۆنی دژی کاندیدێکی سەرکەوتووی کۆتای پێکهاتەی مەسیحیش لە پارێزگای کەرکووک بەناوی (عیماد یوخەنا یاقو) ڕەتکردەوە، بەهۆکاری ئەوەی سکاڵاکە دوای ماوەی ڕێگەپێدراوی یاسایی بۆ سکاڵا تۆمارکردن پێشکەش کراوە و سکاڵاکە یاسایی نەبووە.

لەلایەکی دیکەوە: ئەنجوومەنی کۆمیسیاران سکاڵایەکی دیکەی دژی کاندیدی سەرکەوتووی کۆتای مەسیحی (سامی ئۆشانە کۆرکیس) لە پارێزگای دهۆک ڕەتکردەوە، کە لەسەر دەنگدانی گشتی لە پارێزگای نەینەوا دژی تۆمارکرابوو.

ئەنجوومەنی کۆمیسیاران چەند سکاڵایەکی دیکەی کاندید و لایەنەکانی دیکەی عێراقیشی دژی چەند کاندیدێک بەهۆکاری جیاواز ڕەتکردەوە.