ترەمپ نەتانیاهۆ بۆ کۆشکی سپی بانگهێشت دەکات

ئاڤا نیوز 

نووسینگەی سەرۆکوەزیرانی ئیسرائیل بڵاویکردەوە، بنیامین نەتانیاهۆ، سەرۆکوەزیرانی ئیسرائیل پەیوەندییەکی تەلەفۆنی لەگەڵ دۆناڵد ترەمپ، سەرۆکی ئەمریکا ئەنجام داوە.

بڵاوکراوەی فەرمی: بەگوێرەی ڕاگەیێنراوی دوای پەیوەندییەکە، هەردوولا جەختیان لەسەر گرنگی و پابەندبوونی هاوبەش کردووەتەوە بۆ داماڵینی چەکی بزووتنەوەی حەماس و نەهێشتنی هێزی سەربازی لە کەرتی غەززە.

- هەروەها لە بەشێکی دیکەی پەیوەندی تەلەفۆنییەکەدا، تاوتوێی فراوانکردنی بازنەی ڕێککەوتنە ئاشتییەکان و ئاساییکردنەوەی پەیوەندییەکان لە ڕۆژهەڵاتی ناوەڕاست کراوە.

لە کۆتایی پەیوەندییەکەدا، دۆناڵد ترەمپ بانگهێشتی بنیامین نەتانیاهۆی کردووە بۆ ئەوەی لە ئایندەیەکی نزیکدا لە کۆشکی سپی کۆببنەوە.

زانیاریی بەدەستهاتوو: سەرچاوەیەکی ئاگاداری ئیسرائیلی بە سی ئێن ئێنی ئەمریکی ڕاگەیاندووە، لە پەیوەندییە تەلەفۆنییەکەدا ترەمپ و نەتانیاهۆ باسیان لە دوایین پەرەسەندنەکانی ناوچەکە کردووە لە نێویاندا ئێران.