ئەنجوومەنی وەزیرانی عێراق کۆدەبێتەوە

ئاڤا نیوز

ئەنجوومەنی وەزیرانی عێراق، سێیەم کۆبوونەوەی دوای هەڵبژاردنی ئەنجام دەدات، تاوەکو ئێستا دیار نییە پرسی ناردنی مووچەی فەرمانبەرانی هەرێمی کوردستان دەخرێتە بەر باس یاخود نا. 

وێنە گەورەکە: لەدوای بەڕێوەچوونی هەڵبژاردنی پەرلەمانی عێراق و پەسندکردنی ئەنجامەکان لەلایەن کۆمیسیۆنی باڵای سەربەخۆی هەڵبژاردنەکان، ئێستا حکومەتەکەی سوودانی تا پێکهێنانی حکومەتی نوێ کاربەڕێکەرە و بەردەوامە لە کۆبوونەوەی ئاسایی هەفتانەی خۆی. 

زانیاریی زیاتر: هەر چەندە کارنامەی کۆبوونەوەکە ئاشکرا نەکراوە. بەڵام بەگوێرەی بڕیاری دادگای فیدڕاڵی کە ڕۆژی 17ـی 11ـی ئەمساڵ دەرچوو، حکومەتی عێراق وەک کاربەڕێکەر بەردەوام دەبێت تا پێکهێنانی کابینەی نوێ، ئەمەش بەو واتایەی حکومەتی عێراق تەنیا دەتوانێت کارەکانی ڕۆژانە ئەنجام بدات و ناتوانێت بڕیار لەسەر هیچ پڕۆژەیەکی ستراتیژی بدات.

ئەمەش بزانە: ڕۆژی یەکشەممە لە هەرێمی کوردستان دەستکرا بە دابەشكردنی مووچە مانگی نۆی فەرمانبەران لەکاتێکدا فەرمانبەرانی عێراق مووچەی مانگی 11یان وەرگرتووە، هیچ چاوەڕوانییەکیش نییە پرسی ناردنی مووچەی مانگی 10ی فەرمانبەرانی هەرێمی کوردستان و مانگەکانی دواتر بخرێتە بەر باس.