تیمی چاودێری دارایی عێراق لە وەزارەتی دارایی هەرێمی کوردستانن

ئاڤا نیوز

تیمێکی دیوانی چاودێری عێراق بۆ وردبینیی لە خەرجی و داهاتەکانی حکومەتی هەرێمی کوردستان لە هەولێرن، بڕیارە بۆ ماوەی چەند ڕۆژێک بمێننەوە و پێداچوونەوە بەداتاکان وەزارەتی دارایی هەرێمی کوردستان بکەن.

وێنە گەورەکە: سێ مانگ جارێک تیمێکی دیوانی چاودێری دارایی عێراق سەردانی هەولێر دەکەن، پێداچوونەوە بە تەراوزووی پێداچوونەوە - میزان موراجەعە دەکەن، واتا پێداچوونەوە دەکەن بە خەرجی و داهاتەکانی سەرجەم وەزارەت و فەرمانگەکانی حکومەت.

زانیاریی تایبەت: سەرچاوەیەک لە وەزارەتی دارایی هەرێمی کوردستان بە ئاڤای گوت، "تیمەکە گەیشتوونەتە هەولێر، ئەو داتایانەی پێویستیانە بۆیان ئامادە دەکرێت، سبەی دەست بە پرۆسەی وردبینی لە خەرجی و داهاتی مانگەکانی ڕابردوو دەکەن، بۆ ماوەی چەند ڕۆژێک ئەو پرۆسەیە بەردەوام دەبێت."

ئەمەش بزانە: وەزارەتی دارایی هەرێمی کوردستان، کار لەسەر ئامادەکردنی لیستی مووچەی مانگی 11 و تەرازووی پێداچوونەوەی مانگی 10 دەکات، بۆ ئەوەی لە چەند ڕۆژی داهاتوو ڕەوانەی بەغدا بکرێت.