لە دووەم ڕۆژی لووتکەی BIP زیاتر لە 40 لێکتێگەیشتن واژۆ دەکرێن

ئاڤا نیوز

بۆ دووەم ڕۆژ لەسەریەک کارەکانی سێیەمین لووتکەی BIP بۆ ئابووری و وەبەرهێنان لە هەولێر بەردەوامە و ئەمڕۆ زیاتر لە 40 لێکتێگەیشتن لە نێوان کۆمپانیاکان واژۆ دەکرێن.

وێنە گەورەک: هەرێمی کوردستان وەک ناوەندێکی گرنگی وەبەرهێنان لە جیهان و ناوچەکە سەیر دەکرێت. کابینەی نۆیەمی حکومەتی هەرێمی کوردستان لە ساڵانی ڕابردوو بایەخێکی زۆری بە پێشخستنی کەرتی وەبەرهێنان داوە، بەمەش سێکتەرە جیاوازەکانی کوردستان بەرەوپێشچوونی زۆریان تۆمار کردووە.

لێدوانی فەرمی: د. دارا کەریم مەحموود، بەڕێوەبەری لووتکەی BIP بۆ ئابووری و وەبەرهێنان بە ئاڤای ڕاگەیاند: نیوەڕۆی ئەمڕۆ کۆبوونەوەکان لە نێوان کۆمپانیاکان دەستپێدەکەن، زیاتر لە 40 لێکتێگەیشتن لەگەڵ 13 وڵاتی جیاواز واژۆ دەکرێن کە دیارترینیان، بەریتانیا، چین، هیندستان، ئیتاڵیا، سویسرا، ئیمارات و قەتەر دەبن. 

زانیاریی زیاتر: دوێنێ یەکەم ڕۆژی لووتکەکە بوو، حەوت لێکتێگەیشتن لەگەڵ وڵاتەکانی تورکیا، قوبرس، ئیمارا و قەتەر لە کەرتەکانی گەشتیاری، بوونیادنان، تەکنەلۆژیا و کردنەوەی لقی براندە جیهانییەکان واژۆ کراوە. 

ئەوەی پێویستە بیزانیت: لە لووتکەکەدا زیاتر لە 15 هۆڵدینگ لە هەرێمی کوردستان و عێراق، نزیکەی 15 هۆڵدینگ و گرووپ لە 13  وڵات و 50 گەورە کۆمپانیای نێودەوڵەتی بەشدارییان کردووە. پێشبینی دەکرێت ئەمساڵ 275 ملیۆن دۆلار لید بکرێت.

باکگراوند: لووتکەی یەکەم و دووەمی BIP لە وڵاتی ئیمارات ڕێکخرا بوو، کۆمەڵێک ڕێککەوتن و لێکتێگەیشتن لە نێوان کۆمپانیاکان کران. لە لوتکەی یەکەم 100 ملیۆن دۆلار و لووتکەی دووەم 350 ملیۆن دۆلار لید کراوە.