بارودۆخی گوندی لاجان و خەبات بە تەواوی ئاسایی بووەتەوە

ئاڤا نیوز

دوای چەند کاتژمێرێک لە گرژی و ئاڵۆزیی، ئێوارەی ڕۆژی دووشەممە لە گوندی لاجان و قەزای خەبات، بە تەواوی ئاڵۆزییەکان کۆتاییان هات.

وێنە گەورەکە: ئێوارەی شەممە 29ـی تشرینی دووەم، لە نزیک گوندی لاجان و رۆژی دواتر لە قەزای خەبات گرژی و ئاڵۆزی دروستبوو، بەو هۆیەوە گەنجێک کوژرا و چەند کەسێکی دیکە بریندار بوون، هەروەها زیان بەر چەند شوێنێکی گشتیی کەوت.

 

لە هەمان کاتدا بە هۆی گرژییەکانەوە ترس و دڵەڕاوکی لەناو دانیشتووانی ئەو شوێنانە دروست بوو، لە چەند شوێنێک ڕێگا سەرەکییەکان داخران.

لێدوانی فەرمی: مەقسوود هەرکی، موختاری گوندی لاجان بە ئاڤای ڕاگەیاند، ئیستا بارودۆخی گوندی لاجان بە تەواوی ئاسایی بووەتە و خەڵکی گوندەکە گەڕاونەتە سەر ماڵ و حاڵی خۆیان، ئەو هێزەشی لە لاناز ماوەتەوە، بۆ پاراستنی پاڵاوگەکەیە و هیچ هێزێک نەهاتووەتە نێو گوندەکەمان.

ڕاگەیێنراوی فەرمی: هەر ڕۆژی ڕابردوو لیژنەی ئەمنیی لە پارێزگای هەولێر  پێکهات و هێزە ئەمنییەکان توانییان بە شێوەیەکی هێمنانە دۆخەکە کۆنتڕۆڵ بکەن.

 

دوای کۆنتڕۆڵکردنی دۆخەکە درەنگانی شەوی رابردوو ڕاگەیێنراوێکی بڵاوکردەوە و ڕایگەیاند، هێزە ئەمنییەکان کۆنترۆڵی دۆخەکەیان کردووە، هاوکات باس لەوەشکرابوو "نێچیروان عیسا میرمسو"، لە کاتی ڕاکردنی لە ڕێگای کەرکوک دەستگیر کرا و ڕاپێچی بەردەم یاسا کراوە. ئەو کەسە خەڵکی هانداوە بۆ هەڵگرتنی چەک و تەقاندنەوەی دامەزراوە ئابووری و نیشتمانییەکان.
 
لەلایەکی دیکەوە: هەرلەبارەی گرژی و ئاڵۆزییەکانی گوندی لاجان، سەندیکای ڕۆژنامەنووسانی کوردستان، بانگەوازی میدیاکان دەکات ڕووماڵی ناپیشەییانە ڕابگرن.