بارەگای بارزانی: باخچەلی هێشتا گورگە بۆرەکەی جارانە لە پێستی مەڕدا

ئاڤا نیوز

 

بارەگای بارزانی وەڵامی لێدوانەکەی دەوڵەت باخچەلی سەبارەت بە سەردانەکەی سەرۆک بارزانی بۆ جزیرەی بۆتان دەداتەوە و دەڵێت، "باخچەلی هێشتا گورگە بۆرەکەی جارانە لە پێستی مەڕدا".

 

چیرۆکی سەرەکی:  ڕۆژی شەممە 29-11-2025، لە دووەم ڕۆژی بەڕێوەچوونی "چوارەم سیمپۆزیۆمی مەلای جزیری لە شرناخی باكووری كوردستان"، سەرۆك مەسعود بارزانی بەشداری کرد و وتارێکی پێشکەش کرد، سەردانەکەی کاردانەوەی فراوانی لێکەوتەوە. دەوڵەت باخچەلی یەکێک بوو لە ڕەخنەگران و باسی پاسەوانانی سەرۆک بارزانی کرد، بەهۆی ئەوەی ئاڵای کوردستانیان لە جزیرێی بۆتان هەڵکردبوو.

 

ڕاگەیێنراوی فەرمی: بارەگای بارزانی لەبارەی لێدوانەکەی باخچەلی کە لەسەر سەردانەکەی سەرۆک بارزانی بۆ جزیرەی بۆتان کردبووی، ڕایگەیاند، بەداخەوە دەوڵەت باخچەلی دیسان بەپێی عەقڵیەتی شۆڤینی دواوە، لێدوانی لەسەر سەردانەکەی سەرۆک بارزانی بۆ جزیرێ و بەشداری لە سیمپۆزیەمی مەلای جزیری داوە کە دوورە لە هەموو عورفێک و خزمەتی هیچ لایەک ناکات.

 

لە بەشێکی دیکەی ڕاگەیێنراوەکە هاتووە، "قسەکانی باخچەلی لە حاڵێکدایە کە هەموو ئەو وردەکارییە ئەمنی و ئەو ڕێوشوێنەی بۆ سەردانی سەرۆک بارزانی گیرابووەبەر، بەپێی ڕێککەوتنێکی پڕۆتۆکۆلی بووە لە نێوان دەزگا پەیوەندیدارەکانی هەرێم و تورکیا.

 

بارەگای بارزانی ڕوونی دەکاتەوە، هەمووجار لە کاتی سەردانی بەرپرسە پلە بەرزەکانی تورکیا بۆ هەرێمی کوردستان، یەکە سەربازییە تایبەتەکانی تورکیا لەگەڵیاندا هاتوون و هیچ گرفتێک ڕووینەداوە.

 

ئەوەی پێویستە بیزانیت: لە ڕاگەیێنراوەکەدا ئەوەش هاتووە، سەردانەکەی سەرۆک بارزانی پشتیوانی بوو بۆ پڕۆسەی ئاشتی کە باخچەلی بانگەشەی بۆ دەکات و پشتیوانی لێ دەکات، "ئێمە وامان دەزانی کە خودا دەوڵەت باخچەلی هیدایەت کردووە و  وازی لە ڕەگەزپەرستی و شۆڤینیەت هێناوە، بەڵام دیارە کە هێشتا گورگە بۆرەکەی جارانە ئێستا لە پێستی مەڕدا".