بەشێکی شەقامی 100 مەتریی سلێمانی بەڕووی شۆفێران کرایەوە

ئاڤا نیوز

 

شارەوانیی سلێمانی ئاماژە بەوەدەدات، کارکردن لە شەقامی 100 مەتریی سلێمانی بەردەوامە و بەشێکی شەقامەکە کراوەتەوە، مانگی نۆی ساڵی داهاتووش تەواوی شەقامەکە بەڕووی شوفێران دەکرێتەوە.

 

چیرۆکی سەرەکی: شەقامی 100 مەتریی سلێمانی کە بە "شاڕێی بابان"یش ناسراوە، یەکێکە لە پڕۆژە ستراتیژییەکان و درێژییەکەی 37 کیلۆمەترە، پڕۆژەکە 7 یەکتربڕ، پێنج ئەندەرپاس، چوار پرد و فلای ئۆڤەرێک و 68 ئاوبەرە لەخۆدەگرێت. بڕیاربوو پێش هەڵبژاردن بکرێتەوە، بەڵام بەهۆی هەندێ گرفتی تەکنیکی دواکەوت.

 

لێدوانی فەرمی: زەردەشت ڕەفیق، وتەبێژی شارەوانیی سلێمانی بە ئاڤای گوت، "دوو ڕۆژە شەقامی 100 مەتریی سلێمانی کراوەتەوە، کردنەوەکە بەبێ مەراسیم بووە، ئەو بەشەی کە ماوە لە شەقامەکە تاوەکو مانگی 9ـی 2026 تەواو دەبێت و بەڕووی شوفێران دەکرێتەوە."

 

ئەمەش بزانە: ئەو 26 کیلۆمەترەی کە کراوەتەوە تاسڵوجە بە شەقامی تانجەڕۆ دەبەستێتەوە، شەقامەکە لە ڕێگەی بەرزە پردێکەوە بە گەڕەکی بەکرەجۆش دەبەسترێتەوە.