یۆنان بۆ مەسرور بارزانی: پیرۆزباییت لێدەکەین بۆ ئەنجامدانی پڕۆژە و چاکسازییەکان لە کەرتە جیاوازەکاندا

ئاڤا نیوز

 

سەرۆکوەزیران مەسرور بارزانی لەگەڵ باڵیۆزی یۆنان لە عێراق کۆبووەوە. باڵیۆزی یۆنان خواستی وڵاتەکەی بۆ پەرەپێدانی زیاتری پەیوەندییەکان لەگەڵ هەرێمی کوردستان دەربڕی.

 

چیرۆکی سەرەکی: ئەمڕۆ چوارشەممە 3-12-2025، سەرۆکوەزیران مەسرور بارزانی، بە بۆنەی کۆتاییهاتنی ئەرکەکەی، پێشوازی لە جۆرجیۆس ئەلەمانۆس، باڵیۆزی یۆنان لە عێراق کرد. هاوکات، نیکۆلۆس ستێرگیولاس، کونسوڵی گشتیی یۆنان لە هەرێمی کوردستان ئامادەی دیدارەکەی بوو.

 

زانیاریی زیاتر: لە دیدارەکەدا، سەرۆکوەزیران مەسرور بارزانی وێڕای ئاماژەدان بە پەیوەندیی لەمێژینە و دۆستانەی نێوان هەردوولا، سوپاسی باڵیۆزیشی کرد بۆ کارکردنی لەپێناو بەهێزکردن و بەرەوپێشبردنی پەیوەندیی دوولایەنە لە بوارە جۆراوجۆرەکاندا.

 

لەلایەکی دیکەوە: باڵیۆزی یۆنان ستایشیی کاروانی ئاوەدانیی و پێشکەوتنی هەرێمی کوردستانی کرد و پیرۆزبایی و دەستخۆشیشی لە سەرۆکوەزیران کرد بۆ ئەنجامدانی پڕۆژە و چاکسازییەکان لە کەرتە جیاوازەکاندا، خواستی وڵاتەکەشی بۆ پەرەپێدانی زیاتری پەیوەندییەکان لەگەڵ هەرێمی کوردستان دەربڕی.