شەشەمین پێشانگەی نێودەوڵەتیی عێراق بۆ کتێب لە بەغدا دەکرێتەوە

ئاڤا نیوز

بەیانیی ئەمڕۆ چوارشەممە، شەشەمین پێشانگەی نێودەوڵەتیی عێراق بۆ کتێب لە شاری بەغدا کرایەوە.

 

وێنە گەورەکە: پێشانگەی نێودەوڵەتیی عێراق بۆ کتێب لە 3 تاوەکو 12ی ئەم مانگە بەڕێوەدەچێت، زیاتر لە یەک ملیۆن ناونیشانى کتێب لە بەشە جیاوازەکانەوە نمایش دەکرێن، ئەمە جگە لە سەدان بڵاوکراوەى نوێ بۆ ساڵى 2025، زیاتر لە 450 دەزگاى چاپ و بڵاوکردنەوەی ناوخۆی و نێودەوڵەتی لە 23 وڵاتەوە بەشدارن لە پێشانگەکە.

 

لێدوانی فەرمی: ئیهاب قەیسی، بەڕێوەبەری پێشانگاکە بە ڕۆژنامەی "ئەلمەدا"ی ڕاگەیاند، "ئەم خولە بە ناوی "100 ژنی عێراقی"ـە وەکو ڕێزلێنانێکە بۆ 100 کەسایەتیی ژنی عێراقی کە لە ماوەی تەواوی سەدەیەکدا بەشدارییان لە دروستکردن و پتەوکردنی هۆشیاری ڕۆشنبیری، فیکری، هونەری و کۆمەڵایەتیدا کردووە، هاوکات بەشدارییان کردووە لە بەرەو پێشچوون و کراوەیی بەرامبەر بە ڕێبازی شارستانیەتی مرۆڤایەتی".

 

زانیاریی زیاتر: ناوبراو ئەوەشی خستەڕوو، "پێشانگاکە پێشوازی لە کۆمەڵێک نووسەر، ڕووناکبیر، بیرمەند و هونەرمەندی وڵاتانی عەرەبی و بیانی دەکات، لە چوارچێوەی بەرنامەیەکی ڕۆشنبیری هەمەچەشن کە بریتییە لە سیمیناری فیکری، پانێڵ، واژۆکردنی کتێب، بۆنە هونەرییەکان و وتاردان کە بە درێژایی ڕۆژانی پێشانگاکە بەڕێوەدەچن.