سوودانی وەڵامی ترەمپ دەداتەوە: بەپەرۆش بووم لەسەر دروستکردنی دۆستایەتی

ئاڤا نیوز

محەممەد شیاع سوودانی، سەرۆکوەزیرانی عێراق دەڵێت، لە سەرەتای دەستبەکاربوونی باوەڕی بە دۆستایەتی هەبووە بۆ خزمەتکردنی عێراق لەڕووی سەقامگیری و گەشەکردنەوە. ئەم لێدوانەی سوودانی دوای قسەکانی سەرۆکی ئەمریکا دێت سەبارەت بە کاندیدکردنی لەلایەن عێراقەوە بۆ خەڵاتی "نۆبڵ".

 

چیرۆکی سەرەکی: ڕۆژی سێشەممە، ترەمپ لە کۆشکی سپی ڕایگەیاند، "دوای لەناوبردنی بەرنامی ئەتۆمیی ئێران، عێراق بووەتە وڵاتێکی تەواو جیاواز، پەیوەندییەکانی لەگەڵ ئەمریکا باشتر بوو و هەروەها سەرۆکوەزیرانی عێراق کاندید کردبووم بۆ وەرگرتنی خەڵاتی "نۆبڵ"ی ئاشتی و ترەمپ ئەوەشی ئاشکرا کرد کە پێشبینی هەنگاوێکی لەو جۆرەی لە عێراق نەکردووە.

 

ڕاگەیێنراوی فەرمی: محەممەد شیاع سوودانی، لە تویتەر نووسیوویەتی، "لەوەتەی بەرپرسیارێتیم وەرگرتووە، بە پەرۆش بووم لەسەر دروستکردنی دۆستایەتییەک کە خزمەت بە عێراق بکات، هەر لە سەرەتاوە لەوە تێگەیشتم پەیوەندی دۆستایەتی، نەک دوژمنایەتی، سەقامگیری و گەشەکردن و خۆشگوزەرانی بۆ وڵاتەکەمان دەستەبەر دەکات.

 

لەلایەکی دیکە: سەرۆکی ئەمریکا لە درێژەی قسەکانیدا ئەوەشی گوتبوو: پێشتر تاران لە ڕۆژهەڵاتی ناوەڕاست شەرانگێز بووە و فشاری بۆ سەر عێراق دروست کردووە، بۆ ماوەیەکی زۆریش ناوچەکەی کۆنترۆڵ کردووە، بەڵام ئێستا وا نییە.