ڕێبەر ئەحمەد لە بەغدایە و لەگەڵ سوودانی کۆدەبێتەوە

ئاڤا نیوز

 

بەسەرپەرشتیی محەممەد شیاع سوودانی، سەرۆکوەزیران کۆبوونەوەی لیژنەی باڵای ئەمنیی عێراق لەبارەی هێرشەکەی سەر کێڵگەی کۆرمۆر بەڕێوەدەچێت، هاوکات وەزیری ناوخۆی هەرێمی کوردستانیش لە بەغدایە و جگە لە بەشداریی لەو کۆبوونەوەیە، لەگەڵ سوودانیش کۆدەبێتەوە.

 

وێنە گەورەکە: بڕیار بوو دوای 72 کاتژمێر لە دەستپێکردنی کارەکانی لیژنەی باڵای ئەمنی بۆ لێکۆڵینەوە لە هێرشەکەی کۆرمۆر  ئەنجامەکەی ڕابگەیێنرێت بەڵام ئەو وادەیە تەواو بووە و هێشتا ئەنجامەکە بڵاو نەکراوەتەوە.

 

زانیاریی بەدەستهاتوو: بەگوێرەی زانیارییەکانی ئاڤا میدیا، ئەمڕۆ چوارشەممە و بەسەرپەرشتیی محەممەد شیاع سوودانی، سەرۆکوەزیرانی عێراق، لیژنەی باڵای ئەمنیی عێراق لەبارەی هێرشەکەی سەر کێڵگەی کۆرمۆر کۆدەبێتەوە و تاوتوێی ڕاپۆرتی مەیدانی لیژنەکە لەبارەی هێرشەکە، زیانەکانی و چۆنییەتی ڕێگریی لە دووبارەبوونی کردنە ئامانجی کێڵگەکە دەکات، چاوەڕێش دەکرێت لیژنەکە ڕاسپاردە و بڕیاری پێویست لەم بارەیەوە دەربکات.

 

ئەوانەی بەشداری کۆبوونەوەکە دەکەن بریتیین لە: 

-عەبدولئەمیر شەمەری - وەزیری ناوخۆی عێراق
-ڕێبەر ئەحمەد – وەزیری ناوخۆی هەرێمی کوردستان 
-حەمید شەتری – سەرۆکی دەزگای هەواڵگریی عێراق
-فەریق عەبدولکەریم حەسەن، سکرتێری سەربازیی سەرۆکوەزیرانی عێراق
-فەریق بیلال مەجید ناسر – لە هەواڵگری فەرماندەی ئۆپەراسیۆنە هاوبەشەکان
-فەریق حەماس عەلی سەرحان – ئاژانسی هەواڵگری / وەزارەتی ناوخۆی عێراق
-لیوا غازی عاید موتڵەگ – بەڕێوەبەری گشتیی هەواڵگری و ڕووبەڕووبوونەوەی تیرۆر/ وەزارەتی ناوخۆی عێراق
-هاوکار ئەحمەد محەممەد – بەڕێوەبەری بەڕێوەبەرایەتیی ئاسایشی هەرێمی کوردستان
-عەقید عەلی جەمال – بەڕێوەبەری بەڕێوەبەرایەتیی بەڵگەی تاوان/ وەزارەتی ناوخۆ

 

هەنگاوی داهاتوو: ئاڤا زانیویەتی بڕیارە لە چەند کاتژمێری داهاتوودا ئەنجامی لێکۆڵینەوەی هێرشەکەی سەر کۆرمۆر ڕابگەیێنرێت.

 

لەلایەکی دیکەوە: 30ی مانگی ڕابردووش، سەباح نوعمان، وتەبێژی فەرماندەی گشتی هێزە چەکدارەکانی عێراق بە ئاڤا میدیای ڕاگەیاند، هەرچەندە پێشتر 72 کاتژمێر بۆ ڕاگەیاندنی ئەنجامی لێکۆڵینەوەکان لەسەر هێرشەکەی کێڵگەی کۆرمۆر دیاریکرابوو، بەڵام لەم کاتەدا هیچ وادەیەک بۆ ڕاگەیاندنی لێکۆڵینەوەکان نییە و کاری لیژنەکانی لێکۆڵینەوەش بەردەوامە.

 

باسی لەوەشکردبوو، ڕاگەیاندنی ئەنجامی کۆتایی لێکۆڵینەوەکان پەیوەستە بە کۆتاییهاتنی کاری لیژنەکان کە بە کرداری لێکۆڵینەوە لەم بابەتەدا دەکەن، بەتایبەتیش کە هەندێک لایەنی هونەری لە لێکۆڵینەوانەدا هەیە.

 

باکگراوند: چوارشەممەی ڕابردوو هێرشکرایە سەر کێڵگەی غازی کۆرمۆر لە سنووری قەزای چەمچەماڵ و لە ئەنجامدا ئاگرێکی گەورە لە کۆگایەکی غاز کەوتەوە، هێرشەکە هەرچەندە زیانی گیانی نەبوو، بەڵام بەهۆیەوە بەرهەمهێنانی کارەبای هەرێمی کوردستان بۆ ماوەی چەند ڕۆژێک بەڕێژەی 80% بووەوە.