وەزیری کار و کاروباری کۆمەڵایەتی لەبارەی ڕەوشی ئارام قادر و لاهوور شێخ جەنگی: ئاگاداریان نین

ئاڤا نیوز

وەزیری کار و کاروباری کۆمەڵایەتی لەبارەی ڕەوشی لاهوور شێخ جەنگی و ئارام قادر ڕوونکردنەوە دەدات و دەڵێت، "ئاگاداریان نین"، بەڵام شاسوار عەبدولواحید زۆر باشە.

چیرۆکی سەرەکی: ماوەی چەند مانگێکە سەرۆکی سێ حیزب (هاوپەیمانی نیشتمانی، نەوەی نوێ، بەرەی گەل)، لەلایەن هێزە ئەمنییەکانی سلێمانی دەستگیرکراون و لە زینداندان، جگە لە شاسوار عەبدولواحید، سەرۆکی جووڵانەوەی نەوەی نوێ، تاوەکو ئێستا سەرۆکانی هەردوو حیزبەکەی دیکە نەبراونەتە بەردەم دادگا و کەیسەکانیان یەکلایی نەکراونەتەوە.

لێدوانی فەرمی: کوێستان محەممەد، وەزیری کار و کاروباری کۆمەڵایەتیی حکومەتی هەرێمی کوردستان لەبارەی ڕەوشی هەرسێ سەرۆکەکە لە زینداندا بە ئاڤای ڕاگەیاند، جگە لە شاسوار عەبدولواحید، "ئاگاداری ڕەوشی ئارام قادر، سەرۆکی پێشووی هاوپەیمانی نیشتمانی و لاهوور شێخ جەنگی، سەرۆکی بەرەی گەل نین"، چونکە ئەو دوو سەرۆکە تاوەکو ئێستا دادگایی نەکراون و کەیسەکانیان یەکلایی نەکراونەتەوە.

کوێستان محەممەد ئاشکرای دەکات، "ئەو کەیسانەی دێنە لای ئێمە لە وەزارەتی کار و کاروباری کۆمەڵایەتی، ئەوانەن کە دادگایی کراون، واتە هەتا دادگایی نەکرێن، هیچ کەیسێک بۆ ئێمە نایەت".  دەشڵێت، لەبەرئەوەی شاسوار عەبدولواحید کەیسەکەی چووەتە بەردەم دادوەر و دادگایی کراوە، "بۆیە ئاگاداری ئەوین و ڕەوشی زۆر باشە".

ئەوەی پێویستە بیزانیت: ئارام قادر لە مانگی 6ـی ئەمساڵ لەلایەن هێزە ئەمنییەکانی سلێمانی دەستگیرکرا و تاوەکو ئێستا دادگایی نەکراوە. هەروەها لاهوور شێخ جەنگی، لە 22ـی ئابی هەمان ساڵ دوای ڕووبەڕووبوونەوەی هێزەکەی بەناوی دووپشک لەگەڵ هێزە ئەمنییەکانی سلێمانی، دەستگیرکرا، ئەویش تاوەکو ئێستا دادگایی نەکراوە.

ئەمەش بزانە: شەوی 12 ئابی ئەمساڵ شاسوار عەبدولواحید، سەرۆکی جوڵانەوەی نەوەی نوێ لە گوندی ئەڵمانی لەناو ماڵەکەی خۆی لەلایەن پۆلیسەوە دەستگیرکرا.