بەرەی مقاوەمە هەڕەشە لە ساڤایا دەکات؛ ئەگەر بێدەنگی نەکەن بەردێک دەخەینە دەمییەوە

ئاڤا نیوز

ئەمینداری گشتیی بزووتنەوەی نوجەبا بە تووندی هێرش دەکاتە سەر نێردەی دۆناڵد ترەمپ بۆ عێراق و دەڵێت، ساڤایا "خائینە" و دەستوەردان دەکات، ئەگەر حکومەت و لایەنەکان بێدەنگی نەکەن، ئەوا خۆیان وەڵامی دەدەنەوە و بێدەنگی دەکەن.

چیرۆکی سەرەکی: ئەمڕۆ چوارشەممە 3ـی 12 2025، کە هاوکاتە لەگەڵ ساڵیادی کوژرانی ژمارەیەک لە چەکدارەکانیان، ئەمینداری گشتیی بزووتنەوەی نوجەبا پەیامێکی تووندی ئاراستەی مارک ساڤایا، نێردەی سەرۆکی ئەمەریکا کرد و وتی، ساڤایا بە شێوەیەکی "بێڕێزانە" مامەڵە لەگەڵ سەروەریی عێراق دەکات و هەوڵی "دزینی خێروبێری وڵات" دەدات بۆ "ئاغا ئەمەریکییە ئەحمەقەکەی".

لێدوان فەرمی: ئەکرەم کەعبی، ئەمینداری گشتیی بزووتنەوەی نوجەبا لە پەیامەکەیدا دەڵێت: "بیخەنە مێشکتانەوە، ئەگەر ساڤایا بێدەنگ نەکەن ئەوا مقاوەمەی ئیسلامی بەردێک دەخاتە دەمییەوە و دەینێرێتەوە بۆ لای ئاغاکانی کە دووریان خستبووەوە، ئەو خیانەتی لە وڵاتەکەی کرد و وەفای نەبوو."

لەلایەکی دیکەوە: توڕەییەکەی کەعبی تەنیا لە ئەمەریکا نییە، بەڵکو لە هەڵوێستی لایەنە عێراقییەکانیشە. ئەو پێی وایە هەڵوێستی فەرمی عێراق بەرامبەر دەستوەردانەکانی ساڤایا "شەرمنانە و بێدەنگە"، بۆیە دۆسیەکە دەباتە قۆناغێکی مەترسیدار و هەڕەشەی ئەوە دەکات کە ئەگەر ئەوان بێدەنگی نەکەن، گرووپە چەکدارەکان (مقاوەمە) بە زەبری هێز وەڵامی دەدەنەوە.

ئەوەی پێویستە بیزانیت: ئەم هەڕەشەیە دوای ئەوە دێت کە مارک ساڤایا پێشتر ڕایگەیاندبوو، عێراق لەبەردەم "دووڕیانێکی یەکلاکەرەوەدایە" و بۆ سەقامگیری وڵاتەکە پێویستە چەک لە سیاسەت دووربخرێتەوە و دەسەڵاتەکان لەیەکتر جیابکرێنەوە.

باکگراوند: ڕۆژی 19-10-2025، دۆناڵد ترەمپ، سەرۆکی ئەمریکا، مارک ساڤایای وەک نێردەی تایبەتی بۆ عێراق دەستنیشان کرد، بەمەش ساڤایا بە سێیەم نێردەی ئەمریکی بۆ عێراق دادەنرێت، دوای پۆل بریمەر لە ساڵی 2003 و بریت ماکگۆرک لە ساڵی 2014 لە قۆناغی شەڕی دژی داعشدا. 

پەیامەکەی ئەکرەم کەعبی، ئەمینداری گشتیی بزووتنەوەی نوجەبا بەشێوەی نووسین بە زمانی عەرەبی: