پێشمەرگەیەکی برینداری گرژییەکانی گوندی لاجان گیانی لەدەستدا

ئاڤا نیوز

درەنگانی شەوی ڕابردوو، یەکێک لە بریندارانی گرژی و ئاڵۆزییەکانی گوندی لاجان لە نەخۆشخانە گیانی لەدەستدا، ئەو پێشمەرگە بوو و دانیشتووی سنووری ئیدارەی سەربەخۆی سۆران بوو.

چیرۆکی سەرەکی: پێنج ڕۆژ لەمەوبەر ئارمان سەنار دری، لە ئاڵۆزییەکانی گوندی لاجان بریندار بوو، دوای مانەوەی لە نەخۆشخانەی فریاکەوتنی ڕۆژئاوای هەولێر، کاتژمێر 02:00ـی بەرەبەیانى ئەمڕۆ، بەهۆی سەختی برینەکەی گیانی لەدەستدا.

لێدوانی فەرمی: سالار تەحسین دری، خاڵی ئارمان سەنار، بە ئاڤای گوت، "پێشمەرگەی لەشکری تایبەتی یەک بوو، لە یەکەم ڕۆژی دەستپێکردنی ئاڵۆزییەکە لە ئەرکدا بوو، لە کاتی هاتنەخوارەوەی لە هەمەر گوللەی وێڵی بەرکەوتبوو، گوللەکە بەر گورچیلەیەکی کەوت، بەهۆیەوە گیانی لەدەستدا.

زانیاریی زیاتر: ئارمان تەمەنی 21 ساڵ بووە و دانیشتووی گەڕەکی هەرێمی سنووری ئیدارەی سەربەخۆی سۆران بوو.

باکگراوند: ئێوارەی ڕۆژی شەممە 29-11-2025، گرژی و ئاڵۆزی لە گوندى لاجانى سنوورى قەزاى خەبات ڕوویدا، بەهۆیەوە تا ئێستا دوو کەس گیانیان لەدەستداوە.